पुणे : राज्यात सद्या आगामी विधानसभा निवडणुकांचे वारे वाहू लागले आहेत. या पार्श्वभूमीवर सर्वच राजकीय पक्ष जोरदार तयारीला लागलेले दिसून येत आहे. अनेक नेते आपलं राजकीय अस्तित्व शोधताना दिसत असून त्यासाठी विद्यमान पक्ष सोडून इतर पक्षात जाण्याच्या तयारीतही दिसून येत आहेत. अशातच विधानसभा निवडणुका जाहीर होण्यापूर्वी पुणे जिल्ह्यातून भारतीय जनता पक्षाला धक्का बसणार असल्याचे संकेत मिळत आहेत. भाजपचे पुणे जिल्ह्यातील माजी मंत्री कमळ सोडून तुतारी हाती घेणार असल्याच्या चर्चा होऊ लागल्या आहेत. भाजपचे इंदपूरमधील माजी आमदार हर्षवर्धन पाटील शरद पवार यांच्या राष्ट्रवादी काँग्रेसमध्ये दाखल होणार असल्याचे चिन्ह आहेत.
या दरम्यान, हर्षवर्धन पाटील यांच्या कार्यकर्त्यांनी तुतारीचे स्टेटस ठेवण्यास सुरुवात देखील केली आहे. तसेच हर्षवर्धन पाटील यांचे चिरंजीव राजवर्धन पाटील यांनी देखील तुतारीचे स्टेटस ठेवले आहे. दुसरीकडे मुंबईत हर्षवर्धन पाटील आणि त्यांची कन्या अंकीता पाटील यांनी शरद पवार यांची भेट सुद्धा घेतली. शरद पवार यांच्या सिल्व्हर ओक या निवासस्थानी त्यांची ही भेट झाली असल्याची माहिती समोर येत आहे. या भेटीत पक्षप्रवेशासंदर्भात चर्चा झाल्याची शक्यता वर्तवण्यात येत आहे.
कार्यकर्त्यांनी ठेवले तुतारी चिन्हाचे स्टेटस..
इंदापूरमधील हर्षवर्धन पाटील यांच्या अनेक कार्यकर्त्यांनी तुतारी चिन्हाचे स्टेटस ठेवले आहेत. यामुळे हर्षवर्धन पाटील राष्ट्रवादी काँग्रेस शरदचंद्र पवार पक्षात अधिकृत प्रवेश करण्याचे स्पष्ट संकेत आता मिळू लागले आहेत. काही दिवसांपूर्वी हर्षवर्धन पाटील यांनीही पितृपक्षानंतर आपण आपली भूमिका स्पष्ट करु, असे सूचक विधान केले होते. त्यानंतर घटस्थापनेच्या पहिल्या दिवशीच हर्षवर्धन पाटील त्यांची कन्या अंकीता पाटील यांच्यासह शरद पवार यांच्या मुंबईतील सिल्व्हर ओक या निवास्थानी पोहचले. त्या ठिकाणी शरद पवार यांच्यासोबत त्यांनी चर्चा केली. या वेळी सुप्रिया सुळे देखील उपस्थित होत्या.
हर्षवर्धन पाटील 2024 फिक्स आमदार…, पोस्टर सुद्धा लागले
हर्षवर्धन पाटील यांच्या समर्थक शेतकऱ्यांनी भिगवण येथे हर्षवर्धन पाटील 2024 फिक्स आमदार.. तुतारी वाजवणारा माणूस अशा आशयाचे पोस्टर सुद्धा लावले आहेत. पुणे जिल्ह्यातील इंदापूर भागात भाद्रपद पोळा साजरा केला जातो. या दिवशी बैलांना सजवून गावातून मिरवणूक काढली जाते. सध्या इंदापुरात विधानसभा निवडणुकीचे वारे जोरात तापले आहे. त्यातच इंदापुर तालुक्यातील भिगवणच्या हर्षवर्धन पाटील प्रेमी शाहरुख शेख आणि सलमान शेख या शेतकऱ्यांनी बैलपोळ्याच्या निमित्त हर्षवर्धन पाटील 2024 फिक्स आमदार, तुतारी वाजवणारा माणूस अशा आशयाचे पोस्टर लावले आहेत.
शरद पवार घेणार इंदापूरमध्ये मेळावा..
राष्ट्रवादी काँग्रेस शरदचंद्र पवार पक्षाचे नेते शरद पवार येत्या ७ तारखेला इंदापूरमध्ये मेळावा घेणार असून त्या मेळाव्यात हर्षवर्धन पाटील राष्ट्रवादीत प्रवेश करणार का? हे येत्या येणाऱ्या दोन दिवसांत स्पष्ट होणार आहे. परंतु इंदापूरमधून शरद पवार यांच्या पक्षाचे उमेदवार हर्षवर्धन पाटील असणार आहे, असे बोलले जात आहे. दरम्यान हर्षवर्धन पाटील यांनी शुक्रवारी दहा वाजता इंदापूरमध्ये पत्रकार परिषद आयोजित केली आहे. त्यामध्ये ते आपली भूमिका जाहीर करणार आहे.
