भिगवण : इंदापूर तालुक्यातील भिगवण ग्रामपंचायतीने कर्मचाऱ्यांना एका महिन्याचे वेतन बोनस म्हणून दिले आहे. ती रक्कम कर्मचाऱ्यांच्या बँक खात्यावर जमा करण्यात आली असल्याचे सरपंच दीपिका क्षीरसागर व उपसरपंच सत्यवान भोसले यांनी सांगितले. कामगारांच्या कल्याणासाठी आणि त्यांच्या आर्थिक स्थितीला बळकटी देण्यासाठी हा निर्णय घेतला आहे. या निर्णयामुळे ग्रामपंचायत कर्मचाऱ्यांच्या कुटुंबीयांचा दिवाळी सण आनंदमयी होणार आहे. विशेष म्हणजे दिवाळीपूर्वीच बोनस कर्मचाऱ्यांच्या खात्यावर जमा झाला आहे.
ग्रामपंचायत कर्मचारी वर्षभर गावासाठी, ग्रामपंचायतीसाठी काम करत असतात. अडचणीच्या वेळी रात्री-अपरात्रीही ते कामकाज करत असतात. त्यांच्या या कामाची दखल घेऊन त्यांना दिवाळीपूर्वीच एका महिन्याच्या पगाराएवढा बोनस देण्याचा निर्णय सर्वानुमते घेण्यात आला आहे, असे सरपंच क्षीरसागर यांनी सांगितले.
दरम्यान, माजी उपसरपंच मुमताज जावेद म्हणाल्या की, ग्रामपंचायतीला कर्मचाऱ्यांप्रती सहानुभूती व आपुलकी आहे. सणासुदीच्या काळात बोनसच्या रूपाने कर्मचाऱ्यांचे मनोबल वाढवून त्यांना कामकाज करण्यासाठी प्रोत्साहन देणे गरजेचे आहे.
