पुणे : राज्यात गुन्हेगारी घटनांमध्ये सातत्याने वाढ होताना दिसत आहे. त्यात खून, खुनाचा प्रयत्न, दरोडा यांसारख्या घटना तर घडत आहेत. असे असताना आता पुणे जिल्ह्यातील वडगाव शेरी येथील माळवाडीमधील सत्यम सेरिनेटी सोसायटी येथे विश्वजीतबरोबर का राहता, असे विचारुन आठ ते दहा जणांच्या टोळक्याने दोघा तरुणावर कोयत्याने वार केला आहे आणि त्यांना जीवे मारण्याचा प्रयत्न केल्याचा धक्कादायक प्रकार समोर आला आहे.
याप्रकरणी उद्देश विलास शिंगारे (वय 27, रा. माळवाडी, वडगाव शेरी) यांनी चंदननगर पोलीस ठाण्यात फिर्याद दिली. यावेळी उद्देश शिंगारे यांच्यासह यश टारगे (वय 19, रा. करण रिहा सोसायटी, वडगाव शेरी) हा तरुणही गंभीर जखमी झाला आहे. त्यांच्यावर रुग्णालयात उपचार करण्यात येत आहेत. ही घटना मंगळवारी रात्री साडेअकरा वाजता घडली आहे.
याप्रकरणी पोलिसांनी दिलेल्या माहितीनुसार, फिर्यादी उद्देश शिंगारे त्यांचे मित्र यश टारगे, सार्थक धुमाळ, लखन पवार विश्वजीत पवार आणि सिद्धार्थ शेलार हे एका ठिकाणी बोलत बसले होते. त्यावेळी अचानक त्यांच्यासमोर चार ते पाच मोटारसायकलवरुन आठ ते दहा जण आले. त्यांनी फिर्यादी यांना शिवीगाळ करुन विश्व्या कोठे आहे, असे विचारुन फिर्यादी यांना विश्वजीत बरोबर का राहतो, असे म्हणून त्यांच्या डोक्यात कोयत्याने वार केला. त्यावेळी स्वत:ला वाचविण्यासाठी त्यांनी हात मध्ये घातला. तेव्हा त्यांच्या डाव्या हातावर कोयत्याने वार केल्यामुळे ते गंभीर जखमी केले.
त्यावेळी फिर्यादी यांच्यावर पुन्हा वार करणे सुरु होते त्यावेळी त्यांनी उजवा हातमध्ये घातला. त्यांच्या तळहातावर तो वार बसला. फिर्यादीच्या डाव्या पायाच्या गुडघ्यावर टोळक्यांनी कोयत्याने वार करुन त्यांना गंभीर जखमी केले. यावेळी टोळक्यामधील एका व्यक्तीने यश टारगे याच्या पाठीवर कोयत्याने वार करुन त्यांना जखमी केले. घटनेवेळी तिथे हवेत कोयते फिरवले आणि परत दहशत निर्माण केले. या प्रकरणी पोलिसांनी खूनाचा प्रयत्न केल्याचा गुन्हा दाखल केला आहे. या प्रकरणी सहायक पोलीस निरीक्षक खांडेकर तपास करत आहेत.
