Baramati | बारामती : “पहाटे तीनला उठायचे… स्वयंपाक करून पाच किलोमीटर सायकल वरून ग्राऊंडला पोहचायचे… दोन तास मनापासून ग्राउंडवर सराव करायचं आणि पुन्हा परतायचं… धुणीभांडी करायची….. पोरी शाळेला गेल्या की पुन्हा पाच किलोमीटरवरच्या अभ्यासिकेत जायचे. सायंकाळीदेखील ग्राउंड करून मगच घर गाठायचे… अपार कष्ट, सरावातील सातत्य कायम ठेवलं आणि मेरीटमध्ये येत बारामती तालुक्यातील सोमेश्वर येथील मीनाक्षी कर्चे, आरोही शिळीमकर, दीपाली राणे या तीन विवाहित तरुणी पोलीस भरती झाल्या आहेत.
मनात दुर्दम्य इच्छा शक्ती आणि ठाम निर्धार असेल तर अनेक अडचणींवर मात करत यशाचे शिखर गाठता येते.. याचा प्रत्यय बारामती तालुक्यातील सोमेश्वर ग्रामस्थांसह तालुक्यातील नागरिकांना आला आहे. तीन विवाहित तरुणी महाराष्ट्र पोलीस भरती झाल्याने सर्वत्र त्यांचे कौतुक होत आहे…
दीपाली राणे यांच्या लग्नाला सात वर्ष झालेली. एक चार वर्षाचा मुलगा आहे. पती एका कंपनीत कंत्राटी नोकरी करतात. राष्ट्रीय पातळीपर्यंत खो-खो खेळल्याने पोलिस होण्याचे स्वप्न उराशी बाळगलेले. सासू-सासरे लेकीसारखे पाठीशी उभे राहिले. दीपाली राणे या जवळार्जुन (ता. पुरंदर) गावच्या…पती पश्चिम बंगालला नोकरीत…लग्नाआधी दहावीच झालेली. पुढे पदवीपर्यंत शिक्षण घेतले. भाऊ सागर याच्या सोबत सोमेश्वरला विवेकानंद अभ्यासिका व काकडे महाविद्यालयाच्या मैदानावर तयारी केली. आणि मेरीटमध्ये भरती झाली. गणेश सावंत, लक्ष्मण भोसले, विक्रम बोंद्रे,नीतेश शिंदे,अंकुश दोडमिसे आदींनी मार्गदर्शन केले. मु.सा.काकडे महाविद्यालयाने मैदान उपलब्ध केले.
नवतरुणींना लाजवेल असे यश…
या तिन्ही मैत्रिणी येथील’विवेकानंद अभ्यासिकेत अभ्यास करायच्या….मुलांच्या उज्वल भविष्यासाठी या मातांनी गेली पाच वर्षे प्रचंड त्याग व मेहनत केली आहे. संसार पेलत, बाहेरच्यांच्या टीका पचवत पोलिस भरतीच्या कठीण परीक्षेत नवतरुणींना लाजवेल,असे यश मिळविले आहे. तिघींनीही मागील भरतीतले अपयश पुसून काढले.मीनाक्षी यांची पुणे लोहमार्ग,आरोही यांची ठाणे पोलिस, तर दीपाली यांची पिंपरी पोलिसांत निवड झाली आहे. मीनाक्षी यांच्या लग्नाला पंधरा वर्ष झाली. आहेत त्यांची मोठी मुलगी आठवीला तर लहान मुलगी पाचवीला शिकत आहे.पती व सासू-सासऱ्यांनी पाठबळ दिले. त्यांची आई प्रेरणा बनली.
लग्नाआधी बारावीच शिक्षण होते नंतर पदवी पर्यंत शिक्षण घेतले. पदवी झाल्यावर पोलीस भरतीचे मनावर घेतले. जबाबदाऱ्या कसरत व्हायची. पण, माझ्या मुलीही म्हणायच पोलिसाच्या ड्रेसमध्ये बघायचंय.’ मग बळ वाढायचं. प्रयत्नात सातत्य आणि कष्ट घेतले आणि आज यश मिळाले अशी भावना मीनाक्षी कर्चे यांनी व्यक्त केली
अभ्यासिकेतून रात्री घरी नऊला परतायचे यावेळी सासुबाई स्वतःच स्वयंपाक करून ठेवायच्या.. सासूबाईंनी मुलाला कधी एकटं सोडलं नाही. मी पोलीस भरतीसाठी प्रचंड मेहनत घेऊन परीक्षा दिली. अन् मैत्रिणीचा फोन आला आणि माझं सिलेक्शन झालंय’ असं समजलं.व घरच्यांनी जणू दिवाळी साजरी केली अशी भावना आरोही शिळीमकर यांनी व्यक्त केली.
अंगावर खाकी वर्दी असावी अशी सुरुवातीपासूनच मनात इच्छा होती त्यानुसारच मी भरतीसाठी मेहनत घेत होते. त्याचे चांगले फळ मिळाले असून पुढे फौजदार होण्याचा मनोदय दीपाली राणे यांनी व्यक्त केला.
