पुणे: बँकिंग क्षेत्रात करिअर (Bank Jobs) करू इच्छिणाऱ्या तरुणांसाठी (Pune Jobs) चांगली बातमी आहे. पुणे जिल्हा मध्यवर्ती सहकारी बँकेत लवकरच मोठ्या प्रमाणात नोकरभरती होणार आहे. बँकेकडून लिपिक पदासाठी एकूण 434 जागा भरण्यात येणार आहेत.
या भरतीसाठी अर्ज प्रक्रिया अद्याप सुरू झालेली नाही. इच्छुक उमेदवार 1 डिसेंबर 2025 पासून ऑनलाईन अर्ज करू शकतील. अर्ज करण्याची शेवटची तारीख 20 डिसेंबर 2025 अशी ठेवण्यात आली आहे. अर्ज प्रक्रिया आणि अर्ज शुल्क भरण्याची पद्धत दोन्ही ऑनलाईन असणार आहेत. उमेदवारांनी अर्ज भरण्यासाठी अधिकृत संकेतस्थळ [https://www.pdcc.bank.in/](https://www.pdcc.bank.in/) येथे भेट द्यावी.
ऑनलाईन परीक्षेची तारीख बँकेच्या संकेतस्थळावर स्वतंत्रपणे जाहीर केली जाईल. त्याचप्रमाणे, परीक्षेचे हॉलतिकीट डाउनलोड करण्याची तारीख, कागदपत्र पडताळणी आणि मुलाखतीच्या तारखा देखील अधिकृत संकेतस्थळावर प्रसिद्ध केल्या जातील. त्यामुळे उमेदवारांनी वेळोवेळी संकेतस्थळ तपासत राहणे आवश्यक आहे.
या भरतीमध्ये एकूण जागांपैकी 70 टक्के जागा पुणे जिल्ह्यातील रहिवाशांसाठी राखीव असतील. उर्वरित 30 टक्के जागा पुणे जिल्ह्याबाहेरील उमेदवारांसाठी असतील. मात्र, जर बाहेरील जिल्ह्यातून पुरेसे पात्र उमेदवार उपलब्ध झाले नाहीत, तर उर्वरित पदे पुणे जिल्ह्यातील पात्र उमेदवारांमधून भरली जातील.
अर्ज प्रक्रिया सुरू होण्यासाठी अजून काही काळ शिल्लक असला, तरी इच्छुक उमेदवारांनी आवश्यक कागदपत्रे आणि पात्रतेची माहिती आधीच तयार ठेवणे फायदेशीर ठरणार आहे. पुणे जिल्हा मध्यवर्ती सहकारी बँकेतील ही भरती बँकिंग क्षेत्रात स्थिर आणि चांगल्या संधी शोधणाऱ्या तरुणांसाठी एक सुवर्णसंधी मानली जात आहे.
