पुणे : नाना पेठेतील माजी नगरसेवक वनराज (Vanraj Andekar) यांच्या खुनाला अवघं एक वर्ष होत असतानाच, आयुष कोमकर (Ayush Komkar Murder) याचा गोळ्या झाडून खून करण्यात आला. या धक्कादायक घटनेमुळे शहरभर खळबळ उडाली असून नागरिकांमध्ये भीतीचे वातावरण आहे.

शनिवारी घडलेल्या या घटनेनंतर पोलिसांनी तत्काळ कारवाई करत मुख्य आरोपी बंडू आंदेकरसह तब्बल 12 जणांना अटक केली आहे. प्राथमिक तपासानुसार ही घटना टोळी युद्धाची परिणती नसून वैयक्तिक शत्रुत्वातून घडली असल्याचे समोर येत आहे. तरीदेखील सलग दोन गुन्हेगारी हत्याकांड झाल्याने पुण्यातील कायदा-सुव्यवस्थेबाबत गंभीर प्रश्नचिन्ह उपस्थित झाले आहे.
दरम्यान, या घटनेनंतर राज्याचे उपमुख्यमंत्री आणि गृहमंत्री देवेंद्र फडणवीस पुणे दौर्यावर आले होते. त्यांनी या खुनासंदर्भात प्रसारमाध्यमांशी संवाद साधला. “आयुष कोमकरच्या खुनामुळे पुण्यात टोळीयुद्ध डोकं वर काढत आहे का?” असा प्रश्न पत्रकारांनी विचारला असता फडणवीस म्हणाले, “हे टोळी युद्ध काही नाही. ही त्यांच्यातील वैयक्तिक शत्रुत्वाची बाब आहे. पण हे आम्ही काही चालू देणार नाही.”

तसेच, त्यांनी कठोर शब्दांत इशारा देताना स्पष्ट केले की, “कोणीही डोकं वर काढलं, तर त्याचं डोकं खाली कसं करायचं हे आम्हाला उत्तम माहिती आहे. पोलिस प्रशासन अशा गुन्हेगारी प्रवृत्तीच्या लोकांना कडक शिक्षा देईल.”
फडणवीस यांच्या या वक्तव्यामुळे गुन्हेगारी टोळ्यांना थेट इशारा दिला गेला आहे. आयुष कोमकर हत्याकांडाच्या पार्श्वभूमीवर पोलिसांनी परिसरात मोठा बंदोबस्त तैनात केला असून, टोळ्यांमधील पुढील संघर्ष होऊ नये यासाठी गुप्तहेर विभागालाही सतर्क केले आहे.
नाना पेठ, भेकराईनगर, बिबवेवाडी आणि इतर संवेदनशील भागात पोलिसांची गस्त वाढवण्यात आली आहे. अटक केलेल्या आरोपींना न्यायालयात हजर करण्यात आले असून पुढील तपास गुन्हे शाखा करीत आहे. या सलग घडामोडींमुळे पुण्यातील नागरिकांमध्ये “शहर पुन्हा गुन्हेगारी टोळ्यांच्या तावडीत तर जाणार नाही ना?” अशी चर्चा रंगू लागली आहे.







