लोणी काळभोर (पुणे) : ऑटो रिक्षाची चोरी करून पसार झालेल्या एका ३० वर्षीय तरुणाला गुन्हे शाखा युनिट ६ च्या पोलिसांनी वाघोली (ता. हवेली) परिसरातून अटक केली आहे. प्रविण शांतीनाथ गंगावणे (वय- ३०, रा. केसनंद रोड, वाघोली, ता. हवेली) असे अटक केलेल्या आरोपीचे नाव आहे.
पोलिसांनी दिलेल्या माहितीनुसार, गुन्हे शाखा युनिट ६ चे पथक वाघोली परिसरात गुन्हेगारांची तपासणी करीत असताना पोलीस हवालदार रमेश मेमाणे यांना एका खबऱ्याकडून माहिती मिळाली की, एक व्यक्ती केसनंद फाटा, वाघोली याठिकाणी येणार असून, त्याच्याकडे चोरीची रिक्षा आहे.
संबंधित माहिती वरिष्ठांना देवून, त्यांनी दिलेल्या आदेशानुसार सापळा रचून एका संशयित रिक्षाचालकाला ताब्यात घेतले. त्याच्याकडे चौकशी केली असता त्याने त्याचे नाव वरीलप्रमाणे सांगितले. त्याच्याकडे रिक्षाची चौकशी केली असता, लोणीकंद पोलीस ठाण्याच्या हद्दीतून रिक्षा चोरी केल्याची कबुली आरोपीने दिली आहे.
दरम्यान, पोलिसांनी त्याच्याकडून रिक्षा जप्त केली असून, आरोपीला बेड्या ठोकल्या आहेत. आरोपीची वैद्यकीय तपासणी करुन, पुढील तपास लोणीकंद पोलीस ठाण्याच्या स्वाधीन केला आहे. ही कामगिरी सहायक पोलीस आयुक्त गुन्हे २ चे सतीश गोवेकर यांच्या मार्गदर्शनाखाली वरीष्ठ पोलीस निरीक्षक उल्हास कदम व त्यांच्या पथकाने केली आहे.
