शिक्रापूर : शिक्रापूर (ता. शिरुर) येथे कारचालकाला दमदाटी करत कारची तोडफोड करत जातीवाचक शिवीगाळ केल्याची घटना घडली. याबाबत शेषराव चंद्रभान वानखडे (वय ४२ रा. अडगाव बुद्रुक ता. तेल्हारा जि. अकोला) यांनी शिक्रापूर पोलीस ठाण्यात फिर्याद दिल्याने पोलिसांनी प्रवीण पंढरीनाथ सोनवणे, विपुल हनुमंत शितोळे, प्रसाद शामराव नाळे यांसह पाच अनोळखी इसम व एक महिला (पत्ता माहित नाही) यांच्या विरुद्ध अॅट्रॉसिटीचा गुन्हा दाखल केला आहे.
शिक्रापूर येथील पुणे-नगर महामार्गावरून शेषराव वानखडे हे १६ एप्रिल २०२४ रोजी कारमधून जात होते. त्यांची एका कारचालकासोबत किरकोळ वादावादी झाली. त्यानंतर शिवसेना शिंदे गटाचे हवेली तालुकाध्यक्ष व वितरण समिती सदस्य विपुल हनुमंत शितोळेसह प्रवीण सोनवणे, प्रसाद नाळे व एक अनोळखी इसम व एक महिला तेथे आले. त्यांनी शेषराव यांना त्यांचे नाव विचारून जातीवाचक शिवीगाळ, दमदाटी करत मारहाण करुन त्यांच्या जवळील लाकडी दांडक्याने शेषराव यांच्या कारच्या काचा फोडून नुकसान केले. पुढील तपास उपविभागीय पोलीस अधिकारी प्रशांत ढोले हे करत आहेत.
