पुणे : पुणे शहरातील एफसी रोडवर असलेल्या लिक्विड लेजर लाऊंज या हॉटेलच्या वॉशरूममध्ये काही अल्पवयीन मुले ड्रग्ज सेवन करतानाचा व्हिडिओ सोशल मिडीयावर व्हायरल झाला होता. त्यावरून आता राजकारण चांगलेच तापले आहे. या पार्टीमध्ये काही तरुण टॉयलेटमध्ये ड्रग्ज घेत आहेत, तर अनेक अल्पवयीन मुलांना दारू दिली जात होती. दरम्यान कल्याणीनगर पोर्शे कार अपघात प्रकरणानंतर पुणे पोलीस आयुक्तांनी शहरातील सर्व पब्स आणि रुफटॉप्स मालकांना इशारा दिला होता.
शहरातील फर्ग्युसन रस्त्यावरील ड्रग्स पार्टी प्रकरणात पुणे पोलिसांनी कारवाई करत शिवाजीनगर पोलीस ठाण्यातील दोन पोलीस अधिकाऱ्यांचे निलंबन केले आहे. यापूर्वी दोन बीट मार्शलला देखील या प्रकरणात निलंबित करण्यात आले असून आतापर्यंत ७ जणांना अटक करण्यात आली आहे. दरम्यान, आता या प्रकरणाबाबत केंद्रीय मंत्री तथा पुण्याचे खासदार मुरलीधर मोहोळ यांनी आयुक्तांना सूचना केल्या आहेत.
काय म्हणाले मुरलीधर मोहोळ?
केंद्रीय मंत्री मुरलीधर मोहोळ म्हणाले की, ‘त्या’ व्हायरल व्हिडिओ प्रकरणी शिवाजीनगरचे पोलीस निरिक्षक निलंबित. पुण्यातील अमली पदार्थ सेवन करतानाच्या व्हायरल व्हिडिओ प्रकरणी आपल्या सूचनेनंतर मोठी कारवाई करण्यात आली असून ज्या हद्दीतील हा प्रकार आहे, त्या शिवाजीनगर पोलीस ठाण्याचे गुन्हे पोलीस निरिक्षक, सहायक पोलीस निरिक्षक यांना निलंबित करण्यात आले आहेत.
‘त्या’ व्हायरल व्हिडिओ प्रकरणी शिवाजीनगरचे पोलीस निरिक्षक निलंबित…
पुण्यातील अमली पदार्थ सेवन करतानाच्या व्हायरल व्हिडिओ प्रकरणी आपल्या सूचनेनंतर मोठी कारवाई करण्यात आली असून ज्या हद्दीतील हा प्रकार आहे, त्या शिवाजीनगर पोलीस ठाण्याचे गुन्हे पोलीस निरिक्षक, सहायक पोलीस निरिक्षक…
— Murlidhar Mohol (@mohol_murlidhar) June 24, 2024
निलंबनाची कारवाई ही तत्काळची असली तरी पूर्ण पुणे शहरात अमली पदार्थ विरोधात पुणे पोलीसांची स्वतंत्र मोहिम आणि त्यासाठी स्वतंत्र यंत्रणा, मनुष्यबळ नियुक्त करण्याची सूचनाही आयुक्तांना केली आहे.
सर्व महाविद्यालये, पब्स, हॉटेल्स, संशयास्पद ठिकाणं येथे त्वरीत ही शोधमोहिम कडक कारवाईसह करण्यात यावी आणि अंमली पदार्थ पुणे शहरात उपलब्ध होतात कसे? याच्या मुळाशी पोहचण्यासाठी प्रभावी तपास मोहिम सुरू करण्यात यावी, अशाही सूचना दिल्या आहेत, अशी पोस्ट मुरलीधर मोहोळ यांनी केली आहे.
