लोणी काळभोर : पुणे-सोलापूर महामार्गावर दुचाकीवरून निघालेल्या बाप-लेकाला एका अज्ञात वाहनाने जोरदार धडक दिल्याची धक्कादायक घटना घडली. हा अपघात कदमवाकवस्ती (ता. हवेली) ग्रामपंचायत हद्दीतील इनोव्हरा शाळेजवळ रविवारी (ता. ३) सकाळी साडेदहा वाजण्याच्या सुमारास झाला. अपघातात मुलगा गंभीर जखमी झाला आहे.
सुरज दुपारे (रा. सिद्राम मळा, लोणी काळभोर, ता. हवेली) असे जखमी झालेल्या मुलाचे नाव आहे.
मिळालेल्या माहितीनुसार, पुणे-सोलापूर महामार्गावरून बाप-लेक दुचाकीवरून चालले होते. पुण्याकडून सोलापूरच्या दिशेने जात असताना, त्यांच्या दुचाकीला अज्ञात वाहनाने जोरदार धडक दिली. धडकेने दुचाकीवरील बाप-लेक खाली पडले. या अपघातात दुचाकीवर पाठीमागे बसलेला मुलगा गंभीर जखमी झाला.
स्थानिक नागरिक तातडीने बाप-लेकांच्या मदतीला धावून आले. नागरिकांनी रस्त्यावर पडलेल्या दोघांनाही उचलले व तातडीने रुग्णवाहिकेला पाचारण केले. दरम्यान, या महामार्गावर दुचाकी पडल्याने वाहतूक कोंडी झाली होती. नागरिकांनी तत्काळ महामार्गावरील दुचाकी हटविली. त्यानंतर वाहतूक पुन्हा सुरळीत सुरु झाली.
पुणे-सोलापूर महामार्गावरून दैनंदिन हजारो वाहने ये-जा करतात. मात्र, बापलेकाचा अपघात झाला होता, तेव्हा सुदैवाने कोणतेही वाहन पाठीमागून आले नव्हते. त्यामुळे मोठी दुर्घटना टळली.
