पुणे : पुणे शहरात अपघाताचे सत्र सुरूच आहे. हडपसर-सासवड रस्त्यावरील वडकी बाजारमळा गावात घरासमोर अंगणात थांबलेल्या ज्येष्ठ महिलेला कारने धडक दिल्याची घटना घडली होती. ही घटना ३ जुलै रोजी दुपारी साडेबारा वाजण्याच्या सुमारास घडली. शांताबाई केरबा मोडक (वय-७३, रा. वडकी, सासवड रस्ता) असे मृत्युमुखी पडलेल्या ज्येष्ठ महिलेचे नाव आहे.
याबाबत अधिक माहिती अशी की, शांताबाई माेडक या ३ जुलै रोजी दुपारी साडेबाराच्या सुमारास घरासमोर थांबल्या होत्या. त्यावेळी कारने त्यांना जोरदार धडक दिली. या अपघातात माेडक या गंभीर जखमी झाल्या होत्या. त्यांना रुग्णालयात दाखल करण्यात आले होते.
मात्र, गंभीर जखमी झालेल्या मोडक यांचा उपचारांदरम्यान मृत्यू झाला. या अपघातानंतर मोटारचालक फरार झाला आहे. याप्रकरणी कार चालकाविरुद्ध लोणी काळभोर पोलीस ठाण्यात गुन्हा दाखल करण्यात आला असून पुढील तपास पोलीस उपनिरीक्षक तरटे करत आहेत.
