पुणे : मुंबई-बंगळुरू बाह्यवळण मार्गावरील वडगाव पूल परिसरात दिवाळीतील टिकल्या वाजविण्याच्या बंदुकीने दहशत माजविण्याची घटना नुकतीत घडली आहे. याबाबतची चित्रफीत समाज माध्यमात प्रसारित झाल्यानंतर सिंहगड रस्ता पोलिसांनी दहशत माजविणाऱ्या तरुणांचा शोध घेत दोघांना ताब्यात घेतले आहे.
अक्षय अंकुश गायकवाड (वय २७, रा. स्नेह विहार सोसायटी, दांगट पाटील नगर, शिवणे, एनडीए रस्ता), सुनील चंद्रकांत शिंदे (वय २८, रा. रामनगर, वारजे) अशी ताब्यात घेण्यात आलेल्यांची नावे आहेत. याप्रकरणी दोघांविरुद्ध सिंहगड रस्ता पोलीस ठाण्यात गुन्हा दाखल करण्यात आला आहे. याबाबतची फिर्याद पोलीस उपनिरीक्षक अक्षय पाटील यांनी दिली आहे.
पोलिसांनी दिलेल्या माहितीनुसार, मुंबई-बंगळुरू बाह्यवळण मार्गावरील वडगाव ते वारजे पूल भागातून गुरुवारी (३१ ऑक्टोबर) दोघे जण दुचाकीवरुन निघाले होते. त्यावेळी दुचाकीवरील सहप्रवासी तरुणाने त्याच्याकडील पिस्तूल दाखवून दहशत माजविण्याचा प्रयत्न केला होता. याबाबतचा व्हिडीओ सोशल मीडियावर
तुफान व्हायरल झाला होता. पिस्तुलाचा धाक दाखवून सहप्रवासी तरुण वाहनचालकांना शिवीगाळ करत असल्याचे या व्हिडिओमध्ये दिसत आहे.
संबंधित व्हिडीओ सोशल मीडियावर व्हायरल झाल्यानंतर सिंहगड रस्ता पोलिसांनी दुचाकीवरील गायकवाड आणि शिंदे यांचा शोध घेत त्यांना ताब्यात घेतले. चौकशीत दोघांनी धमकाविण्यासाठी वापरलेले पिस्तूल दिवाळीतील टिकल्या वाजविण्याचे असल्याचे सांगितले. खोटे पिस्तूल बाळगून दहशत माजविल्याप्रकरणी त्यांच्याविरुद्ध सिंहगड रस्ता पोलीस ठाण्यात गुन्हा दाखल करण्यात आला आहे. याप्रकरणाचा पुढील तपास पोलीस करत आहेत.
