पुणे: शहरातील जवळपास सर्व धर्मादाय रुग्णालयाकडून पुणे महानगरपालिकेचा सर्वसाधारण कर जमा केल्याची माहिती पुणे महानगरपालिकेच्या करसंकलन विभागाच्या उपायुक्त प्रतिभा पाटील यांनी दिली आहे. दीनानाथ मंगेशकर रुग्णालयाकडून २०१५पासून काही प्रमाणात मिळकतकर जमा करण्यात आला आहे. तरी देखील धर्मादाय आयुक्तांच्या अहवालानंतर मंगेशकर रूग्णालयास टाच लावण्याची कारवाई केली जाणार असल्याची ग्वाही पाटील यांनी दिली आहे.
शहरातील जहांगीर, रूबी हॉल, सूर्या, सह्याद्री या प्रमुख रुग्णालयासह धर्मादाय रुग्णालयाकडून पालिकेच्या तिजोरीत कर जमा करण्यात आला आहे. पुणे महानगरपालिकेचे दीनानाथ मंगेशकर रुग्णालयाकडे मिळकतकराचे २२ कोटी रुपये थकलेले आहेत. त्यामुळे पुणे महापालिकेने या रूग्णालयाला जप्तीची नोटीस पाठविली आहेत. त्यात मिळकत कराचे २२ कोटी रुपये दोन दिवसांत जमा करावी अन्यथा पुढील कारवाई केली जाईल, असा इशारा दिला होता. याबाबत पाटील यांनी पालिकेच्या विधी विभागाकडे खटल्याबाबत चौकशी केली होती. गेल्या वर्षभरात याबाबत कोणतीही सुनावणी झालेली नसल्याची माहिती विधी विभागाकडून पाटील यांना देण्यात आली आहे.
दीनानाथ मंगशेकर रूग्णालयात उपचार न मिळाल्यामुळे तनिषा भिसे या गर्भवती महिलेचा मृत्यू झाला होता. ही बाब उघडकीस आल्यानंतर त्यानंतर दीनानाथ मंगेशकर रूग्णालयाकडे २७ कोटीचा मिळकत कर थकविला आहे. दीनानाथ मंगेशकर रुग्णालयाच्या प्रशासनाला महापालिकेकडून दणका देण्यासाठी आता धर्मादाय आयुक्तांच्या अहवालाचे सविस्तर विश्लेषण केले जाणार आहे. गेल्या आठ वर्षांपासून महापालिकेचा २७ कोटी ३८ लाख ६२ हजार ८७४ रुपयांचा मिळकतकर थकविल्याप्रकरणी दीनानाथ मंगेशकर रुग्णालयास नोटीस देण्यात आहे.
एरंडवणा येथील रुग्णालय हे लता मंगेशकर मेडिकल फाऊंडेशनच्या मालकीचे आहे. या मिळकतीवर २०२४-२५ या आर्थिक वर्षाअखेर सुमारे २७कोटी ३८ लाख ६२ हजार ८७४ इतका मिळकत कर थकबाकी आहे. या मिळकतीवर आकारलेली कर आकारणी मान्य नसल्याने फाऊंडेशनने २०१६-१७ साली महापालिकेविरुद्ध न्यायालयात दाद मागितली होती. दाव्यात फाऊंडेशनने मिळकत करात समाविष्ट असलेल्या जनरल टॅक्सच्या पन्नास टक्के रक्कम आणि इतर कर भरण्याचे आदेश दिले होते. त्यानुसार २०१४ ते २०२५ अखेर फाउंडेशनकडे एकुण २२ कोटी ६ लाख ७६ हजार ८१ रुपये इतकी मिळकत कराची थकबाकी आहे.
