पुणे: पुणे शहरात पब्स आणि रेस्टॉरंट्समध्ये अल्पवयीन मुलांना अवैधपणे मद्य विक्री होत असल्याचा धक्कादायक प्रकार समोर आला आहे. शहरातील ‘किकी’ (Kiki) नावाच्या पबमध्ये नामांकित कॉलेजमधील तरुण-तरुणींसाठी आयोजित करण्यात आलेली ‘फ्रेशर्स पार्टी’ महाराष्ट्र नवनिर्माण विद्यार्थी सेनेने (मनविसे) बंद पाडली.
या पार्टीत पब चालक सरसकट अल्पवयीन मुलांना दारू विकत होते, असा आरोप मनविसेच्या कार्यकर्त्यांनी केला आहे. पब चालकांनी कोणतीही ओळखपत्र तपासणी केली नाही किंवा प्रवेशाची नोंद ठेवली नाही. 17 ते 21 वयोगटातील अनेक विद्यार्थ्यांना सहज प्रवेश देण्यात आला होता.
या कारवाईदरम्यान, मनविसेच्या कार्यकर्त्यांसोबत राज्य उत्पादन शुल्क विभागाचे अधिकारीही उपस्थित होते. मनविसेने हा गैरप्रकार उघडकीस आणत ही पार्टी तातडीने बंद पाडली.
या घटनेमुळे शहरातील पब्समध्ये होत असलेल्या अवैध मद्य विक्रीवर पुन्हा एकदा प्रश्नचिन्ह उभे राहिले आहे. मनविसेने पब चालकांना इशारा दिला आहे की, यापुढे जर कोणत्याही पब किंवा रेस्टॉरंट्समध्ये अल्पवयीन मुलांना दारू पाजल्यास, त्या पबची तोडफोड केली जाईल. या घटनेमुळे पुणे शहरातील पब्समध्ये होत असलेल्या गैरकृत्यांवर पुन्हा एकदा प्रश्नचिन्ह निर्माण झाले आहे. यापुढे अशा घटनांवर कठोर कारवाई केली जाईल, असे संकेत प्रशासनाकडून मिळत आहेत. यामुळे भविष्यात पब चालकांना अधिक जबाबदारीने वागावे लागेल.
