पुणे : उपमुख्यमंत्री अजित पवार यांनी राष्ट्रवादीचे शिरूरचे खासदार अमोल कोल्हे यांना थेट आव्हान दिल्यानंतर आज कोल्हे यांनी राष्ट्रवादीचे सर्वेसर्वा शरद पवार यांची भेट घेतली. या भेटीनंतर त्यांनी माध्यमांशी संवाद साधला. अजितदादांचा दरारा मोठा आहे. त्यांनी केंद्र सरकारशी बोलून कांदा निर्यात बंदी उठवावी. त्यांच्याकडे अर्थखातं आहे, तर त्यांनी दूध उत्पादक शेतकऱ्यांना न्याय द्यावा. मी माझ्या तत्त्वांसोबत आहे. संधी होती तेव्हाही मी सुभेदारी स्वीकारली नाही. तत्वांशी तडजोड केली नाही. म्हणून तर आज ताठ मानेन जगतोय, असं म्हणत अमोल कोल्हे यांनी अजित पवार यांना टोला लगावला.
अमोल कोल्हे म्हणाले की, आमदार कोण-कोणत्या कारणामुळे भूमिकेत आहेत हा चर्चेचा विषय आहे. माझा ना कारखाना आहे, ना कंपन्या आहेत. ना माझ्यावर चौकशी आहे. त्यामुळे कुणाला निवडून द्यायचं ते जनता ठरवेल. येणाऱ्या भविष्य काळात गणित दिसेलच, असे सांगत कोल्हे यांनी अजितदादांनी उल्लेख केलेल्या एका चित्रपटाचा दाखल देत टीका केली. अजितदादांनी काल एका चित्रपटाचा उल्लेख केला. एका चित्रपटातील संवाद आहे की, छत्रपती शिवाजी महाराजांना दक्खनची सुभेदारी द्यावी, असं दिल्लीपतींच्या मनात होतं. दख्खनची सुभेदारी ही स्वराज्याच्या कैक पट होती. मात्र, तेव्हा सुभेदारी स्वीकारली नाही. म्हणून आज ताठ मानेन जगतोय, असं म्हणत त्ंयांनी अजित पवार यांना टोला लगावला.
शेतकऱ्यांच्या प्रश्नांसाठी आम्ही रस्त्यावर उतरत आहोत. सहा मुद्दे घेवून आपण यात्रा करत आहोत. कांदा बंदी उठवावी. दिवसा वीज द्यावी. विमा कंपन्याचे धोरण निश्चित करावे. दुधाचे दर पडले आहेत. २६ लाख लिटर दुधाचे कलेक्शन आहे. शेतकऱ्यांना सरसकट कर्जमाफी द्यावी, यासाठी आम्ही यात्रा काढत आहोत. या यात्रेसाठी शरद पवार यांचे मार्गदर्शन घेतले आहे. पवारसाहेब देशाचे कृषीमंत्री होते तेव्हा कांद्यावर बंदी आणावी, अशी भाजपची भूमिका होती; मात्र पवारांनी ठाम भूमिका घेतली आहे. आता शेतकऱ्यांच्या हितासाठी सरकारने निर्णय घ्यावेत यासाठी आम्ही यात्रा काढतोय, असंही अमोल कोल्हे म्हणाले.
