पुणे : आगामी स्थानिक स्वराज्य संस्थांच्या निवडणुका तोंडावर असताना शहराच्या राजकारणात मोठी उलथापालथ झाल्याचे दिसून येत आहे. पुण्यात अजित पवार गटाने काँग्रेसला धक्का दिला असून, माजी नगरसेविकेनं संपूर्ण परिवारासह राष्ट्रवादी काँग्रेस (अजित पवार) मध्ये प्रवेश करण्याचा निर्णय घेतला आहे.
माजी नगरसेविका सुजाता शेट्टी, माजी स्थायी समिती अध्यक्ष सदानंद शेट्टी आणि त्यांचे पुत्र साक्षात शेट्टी यांनी काँग्रेसला सोडचिठ्ठी देत अजित पवार यांच्या राष्ट्रवादी काँग्रेसमध्ये प्रवेश करण्याचा निर्णय घेतला आहे. उपमुख्यमंत्री अजित पवार यांच्या पुणे दौऱ्यादरम्यान, खडकवासला विधानसभा मतदारसंघात आयोजित ‘राष्ट्रवादी परिवार मिलन’ कार्यक्रमात हा पक्षप्रवेश होणार आहे.
शेट्टी कुटुंबाचे कॅन्टोन्मेंट विधानसभा मतदारसंघात चांगले वर्चस्व आहे. सुजाता शेट्टी या 2017 च्या महापालिका निवडणुकीत काँग्रेसमधून निवडून आल्या होत्या. तसेच, काही महिन्यांपूर्वीच काँग्रेसने सदानंद शेट्टी यांना प्रदेश सरचिटणीस या महत्त्वाच्या पदावर नियुक्त केले होते. अशातच काँग्रेसची पुण्यातील ताकद वाढत असतानाच शेट्टी कुटुंबाने घेतलेल्या या निर्णयामुळे पक्षाला मोठा धक्का बसला असून, राजकीय वर्तुळात याची चर्चा रंगली आहे.
