बारामती: राष्ट्रवादी काँग्रेसच्या दोन गटांमधील वाद आता पवार कुटुंबियांपर्यंत पोहचला आहे. उपमुख्यमंत्री अजित पवार यांचे श्रीनिवास पवार यांनी राष्ट्रवादी काँग्रेसचे अध्यक्ष शरद पवार यांना पाठिंबा देत अजित पवार यांच्यावर सडकून टीका केली होती. त्यानंतर बारामतीत बुधवारी अजित पवार गटाच्या कार्यकर्त्यांनी श्रीनिवास पवार यांचे पुत्र युगेंद्र पवार यांना घेराव घातला. अजित पवार गटाच्या कार्यकर्त्यांनी युगेंद्र पवार यांना उपमुख्यमंत्री अजित पवारांची बदनामी का करत आहात? असा प्रश्न विचारला. यावेळी युगेंद्र पवार यांच्यासोबत असलेल्या इतर काही जणांनी संबंधित कार्यकर्त्यांची समजूत काढली. त्यानंतर युगेंद्र पवार
पुढील कार्यक्रमासाठी निघून गेले.
शरद पवार यांच्यासोबत असणारे कुटुंबिय हे त्यांचा प्रचार करत आहेत. युगेंद्र पवार यांचा बुधवारी बारामती तालुक्यात गावभेट दौरा आयोजित केलेला होता. यावेळी एका गावात अजित पवारांच्या समर्थक कार्यकर्त्यांनी त्यांना घेराव घालत जाब विचारला. सोशल मीडियावर उपमुख्यमंत्री अजित पवारांची बदनामी का करत आहात? असा प्रश्न कार्यकर्त्यांनी युगेंद्र पवार यांना विचारला.
बारामतीत श्रीनिवास पवार यांनी दोन दिवसांपूर्वी भाषण केलं होतं.त्यांच्या या भाषणाचा व्हिडीओ सोशल मीडियावर प्रचंड व्हायरल झाला होता. त्यानंतर अजित पवार गटावर टीका केली जात होती. त्यामुळे युगेंद्र पवार बारामतीत दौऱ्यावर असताना अजित पवार गटाच्या कार्यकर्त्यांनी त्यांना घेराव घालत अजित पवारांची बदनामी का करताय? असा संतप्त सवाल केला. यानंतर युगेंद्र पवार यांनी कार्यकर्त्यांशी चर्चा केली व ते तिथून पुढे निघून गेले.
