लोणी काळभोर : दारू पिण्यासाठी पैसे न दिल्याने डेरी मालकाला तिघांनी मिळून मारहाण केल्याची घटना हांडेवाडी (ता. हवेली) परिसरात बुधवारी (ता. ३) रात्री पावणेदहा वाजण्याच्या सुमारास घडली. याप्रकरणी लोणी काळभोर पोलिसांनी आरोपीला अटक केली आहे.
आदित्य अशोक कवडे (वय-२२ , रा. मनस्वी हाईट्स, जाधवनगर, हांडेवाडी, पुणे) असे अटक करण्यात आलेल्या आरोपीचे नाव आहे. तर आरोपीच्या इतर दोन अज्ञात साथीदारांवर गुन्हा दाखल करण्यात आला आहे. याप्रकरणी अविष्कार झांबरे (वय-१९ वर्ष, रा. झांबरे वस्ती, होळकरवाडी, पुणे) याने लोणी काळभोर पोलीस ठाण्यात फिर्याद दिली.
याबाबत लोणी काळभोर पोलिसांनी सांगितले की, फिर्यादी झांबरे यांची हांडेवाडी चौकात गुरुदत्त नावाची दुध डेअरी आहे. तर फिर्यादी झांबरे यांच्या ओळखीचे व परिचयाचे तिन्ही आरोपी आहेत. तिन्ही आरोपी संगनमत करून फिर्यादी यांच्या दुध डेअरी दुकानात घुसून त्यांना दारु पिण्यासाठी पैसे मागितले. फिर्यादी यांनी पैसे देण्यास नकार दिला असता आरोपींनी फिर्यादी व त्यांचा कामगार यांना शिवीगाळ व दमदाटी करुन लोखंडी रॉडने मारहाण केली.
आरोपींनी जीवे मारण्याची धमकी देऊन डेअरीतील फ्रिज व इतर साहित्य फोडून साहित्याचे नुकसान केले. तसेच जाताजाता आरोपींनी डेअरीच्या गल्ल्यातील २ ते ३ हजार रुपये रोख रक्कम घेऊन दुचाकीवरून पळून गेले होते. याप्रकरणी झांबरे यांनी लोणी काळभोर पोलीस ठाण्यात फिर्याद दिली.
या फिर्यादीवरून लोणी काळभोर पोलीस ठाण्यात गुन्हा दाखल करण्यात आला आहे. गुन्हा दाखल होताच लोणी काळभोर पोलिसांनी आरोपी आदित्य कवडे याला अटक केली आहे. पुढील तपास लोणी काळभोर पोलीस ठाण्याचे सहाय्यक पोलिस निरीक्षक किशोर पवार करत आहेत.
