अहमदनगर : नाशिक – पुणे महामार्गावर संगमनेरच्या चंदनापुरी गावाजवळ मोठा अपघात झाला आहे. हा अपघात इतका भीषण होता की, यात चौघांचा जागीच मृत्यू झालाआहे. मालवाहतूक ट्रक कारवर कोसळल्याने कारचा चक्काचूर झाला आहे. मृतांमधील सर्व कारमधील असल्याची प्राथमिक माहिती आहे.
विशेष म्हणजे या दुर्घटनेनंतर ट्रकचालक फरार झाल्याची माहिती मिळत आहे. अपघाताची माहिती मिळताच स्थानिक नागरिकांनी घटनास्थळी एकच गर्दी केली होती. त्यानंतर अपघात पाहून पोलिसांना घटनेची माहिती दिली. काहीवेळात पोलीस घटनास्थळी दाखल झाले होते.
पोलिसांनी दिलेल्या माहितीनुसार, आठ वाजेच्या दरम्यान हा अपघात झाला. संगमनेर तालुक्याच्या पोलीस स्टेशनच्या हद्दीतील चंदनापुरी घाटात हा अपघात झाला. नाशिककडे जाणाऱ्या एका ट्रक आणि कारमध्ये हा भीषण अपघात झाला आहे. त्यात चार जणांचा मृत्यू झाला आहे. मृतांमध्ये दोन पुरुष, एक महिला आणि एका लहान चिमुकल्याचा समावेश आहे. तर एक महिला जखमी झालेली आहे. सध्या सर्व वाहतूक सुरळीत करण्यात आली आहे. हा अपघात कसा झाला त्याची अग्याप माहिती समोर आली नाही. प्रथम दर्शी ट्रक चालक दोषी असल्याचा अंदाज आहे.
पोलिसांकडून सांगण्यात आहे की, तपास करुन किंवा जी महिला जखमी आहे तिचा जबाब नोंदवून अपघाताचे खरं कारण शोधलं जाईल. त्यानंतर, जो ट्रकचालक फरार झालेला आहे त्याचा शोध घेतल्यानंतर यात कुणाची चुकी आहे, हे निष्पन्न होणार आहे. त्यानंतर गुन्हा दाखल करुन संपूर्ण तपास करणार आहेत.
