पिंपरी : हॉटेल व्यावसायिकाला मारहाण करणाऱ्यांच्या तावडीतून सोडवणाऱ्या तरुणाला काचेची बाटली तसेच लाकडी खुर्चीने डोक्यात मारहाण करुन जखमी केले. तसेच तरुणाला जीवे मारण्याची धमकी दिल्याप्रकरणी तिघांवर हिंजवडी पोलिसांनी गुन्हा दाखल केला आहे. हिंजवडी-वाकड रस्त्यावरील इको लॉन्ज हॉटेलमध्ये रविवारी (ता. ७) मध्यरात्री साडेतीन वाजण्याच्या सुमारास हा प्रकार घडला.
याबाबत शिवम राज सिंग (वय-२४, रा. विंग शगुन सोसायटी किवळे, मामुर्डी, देहू रोड) याने हिंजवडी पोलीस ठाण्यात फिर्याद दिली आहे. यावरुन अजित सदाशीव होके (वय २६, रा. भिमशक्तीनगर, निगडी), अशिष जयसिंग आवारे (वय २८, रा. अभिजीत पार्क, थेरगाव), राकेश शिंदे व इतरांवर गुन्हा दाखल केला आहे.
पोलिसांनी दिलेल्या माहितीनुसार, फिर्यादी शिवम सिंग व त्याचे मित्र अभिषेक रिहान, उज्ज्वल राज हे इको लॉन्ज हॉटेलमध्ये पार्टी करण्यासाठी गेले होते. त्यावेळी आरोपी हॉटेलचे मालक कौशल यांना मारहाण करत होते. त्यामुळे शिवम सिंग हॉटेल मालकाला सोडवण्यासाठी गेला. त्यावेळी आरोपींनी संगनमत करुन शिवम याला लाथाबुक्क्यांनी तसेच काचेच्या बाटलीने, ग्लास व लाकडी खुर्चीने शिवमच्या डोक्यात मारहाण करुन गंभीर जखमी केले. ‘तुझे जानसे मार दुंगा’ अशी धमकी दिली.
या घटनेचा पुढील तपास पोलीस उपनिरीक्षक यलमार करीत आहेत.
