पुणे : मुंबई-बंगळुरू बाह्यवळण मार्गावर नवले पुलाजवळ एक तरुण मृतावस्थेत आढळल्याने एकच खळबळ उडाली. दरम्यान, या तरुणाच्या डोक्यात दगड घालून त्याचा निघृण खून करण्यात आल्याचे उघडकीस आले आहे. पोलीस खुनाचा अधिक तपास करत आहेत. मात्र, अद्याप या खुनामागील निश्चित कारण अद्याप समजू शकलेले नाही.(Pune Murder ase)
याबाबत मिळालेल्या माहितीनुसार, सौरभ रुपेश शिंदे (वय २३, रा. आंबेगाव पठार, धनकवडी) असे खून झालेल्या तरुणाचे नाव आहे. याबाबत त्याचे वडील रुपेश (वय ४९) यांनी सिंहगड रस्ता पोलीस ठाण्यात फिर्याद दिली आहे.(Pune crime news)
पोलिसांनी दिलेल्या माहितीनुसार, मुंबई-बंगळुरू बाह्यवळण मार्गावर स्वामी नारायण मंदिराच्या परिसरातील मोकळ्या जागेत तरुण मृतावस्थेत पडल्याची माहिती पोलिसांना मिळाली. तत्काळ पोलिसांनी घटनास्थळी धाव घेतली. त्यानंतर पोलिसांनी मृतदेहाची ओळख पटवली. तपासादरम्यान, सौरभच्या डोक्यात दगड घालून खून करण्यात आल्याचे उघडकीस आले आहे. खुनामागचे कारण अद्याप समजू शकले नाही. या गुन्ह्यातील फरार झालेल्या आरोपींचा शोध घेण्यात येत आहे.
