पुणे : कात्रज परिसरात एक धक्कादायक घटना उघडकीला आली आहे. दहावीचा पेपर देऊन घरी निघालेल्या तरुणाला थांबवून, ‘ तुला खूप माज आलाय का?’ अशी विचारणा करत, शिवीगाळ व धारदार हत्याराने मारहाण करुन जखमी करण्यात आले आहे. ही घटना मंगळवारी (ता. २६) दुपारी दीडच्या सुमारास कात्रज-कोंढवा रोडवरील कृष्णा सागर हॉटेलसमोर घडली. या प्रकरणी तिघांवर गुन्हा दाखल केला आहे.
याबाबत संतोषनगर, कात्रज येथे राहणाऱ्या १७ वर्षीय मुलाने भारती विद्यापीठ पोलीस ठाण्यात फिर्याद दिली आहे. यावरुन अमिन मुल्ला, आयान शेख, तनवीर शेख व आबू रेहमान यांच्यावर गुन्हा दाखल केला आहे.
पोलिसांनी दिलेल्या माहितीनुसार, मृणाल मंगळवारी दहावीचा पेपर सुटल्यानंतर घरी जात होता. त्यावेळी आरोपीने त्याला हाक मारुन थांबवले. आरोपींनी मृणाल याच्याजवळ येऊन ‘तुला खूप माज आलाय का?’ असे म्हणत शिवीगाळ केली. त्यानंतर आरोपींनी त्याला लाथा-बुक्क्यांनी मारहाण करण्यास सुरवात केली. एका आरोपीने त्याच्या हातातील धारदार हत्याराने मृणाल याच्या डाव्या हातावर मारुन गंभीर जखमी केले व आरोपींनी तेथून पळ काढला.
या घटनेचा पुढील तपास पोलीस हवालदार अनिल भोसले करीत आहेत.
