-राहुलकुमार अवचट
यवत : दौंड तालुक्यातील केडगाव येथे तरुणावर धारदार शस्त्राने वार झाल्याची घटना घडली आहे. ही घटना शनिवारी (दि. 02 नोव्हेंबर) रोजी रात्री 09.30 च्या सुमारास घडली आहे.
याबाबत अधिक माहिती अशी की, केडगाव गावच्या हद्दीतील श्री स्वामी समर्थ मंदिर येथील कॅनॉल रोडवर शुभम प्रकाश शेळके हा आपल्या मित्रासोबत जात असताना मुलीशी बोलण्याच्या कारणावरून तीन अनोळखी तरुणांनी दमदाटी करत धारदार कोयत्याने डोक्यावर मारण्याचा प्रयत्न केला. परंतु तरुणाने हात मध्ये घातल्याने उजव्या हाताला दुखापत झाली. तरुणास जीवे मारण्याच्या उद्देशाने हातावर पायावर मारहाण करण्यात आली. तर मित्र अतिश टेंगले याच्या पायावर कोयत्याने मारहाण करून तिघेही फरार झाले आहेत.
याबाबत कटकारस्थान करून जीवे मारण्याचा प्रयत्न केल्याची फिर्याद शुभम शेळके यांनी यवत पोलीस स्टेशन येथे दिली. यावरून बाळासाहेब जिजाबा सोडनवर ( केडगाव), शुभम रूपनवर (रा. दापोडी ) व इतर तीन अनोळखी व्यक्तींवर गुन्हा दाखल करण्यात आला आहे. याबाबत पुढील तपास सहाय्यक पोलीस निरीक्षक कांबळे हे करत आहे.
