वाघोली : केश कर्तनालयात काम करणाऱ्या कामगाराने चेष्टा मस्करीत गालात मारल्याने चिडलेल्या तरुणाने रस्त्यावर येत दोन दुचाकीवर फावड्याने हल्ला केला. यामध्ये दुचाकीचे नुकसान झाले. सुदैवाने दुचाकी धारकांना इजा झाली नाही. ही घटना वाघोलीत बकोरी रोडवर मंगळवारी दुपारी घडली. त्या तरुणाला अटक करण्यात आली आहे.
या प्रकरणी पराग भगवान कोल्हे ( वय-39, रा. ड्रिम संकल्प सोसायटी, बकोरी रोड, वाघोली ) यांनी फिर्याद दिली असून ज्ञानेश्वर सोमनाथ निचळ (वय-20 वर्षे, रा. सृष्टी पार्क जवळ, थेऊर ) याला अटक करण्यात आली आहे. पोलीसांनी दिलेल्या माहितीनुसार, ज्ञानेश्वर हा बकोरी रोड वरील केश कर्तनालयात गेला. तिथे तेथील केश कर्तनालयातील कामगारासोबत त्याची चेष्टा मस्करी सुरू होती. त्या केश कर्तनालयातील कामगाराने त्याला गालात मारले. त्याचा राग आल्याने तो बाहेर रस्त्यावर आला व त्याने रस्त्यावरून जाणाऱ्या पराग कोल्हे व धनराज खानगावकर यांच्या दुचाकीवर फावडयाने हल्ला केला.
यामध्ये दुचाकीचे नुकसान झाले. सुदैवाने दोन्ही दुचाकी धारकाला इजा झाली नाही. तसेच त्याने शिवीगाळ करत कोणी मध्ये आले तर जिवे ठार मारून टाकेल अशी धमकी देवून मोठमोठ्याने आरडा ओरडा सुरू केला. यामुळे नागरिकही घाबरले. फिर्याद दाखल झाल्यानंतर लोणीकंद पोलीसांनी त्याला त्वरीत अटक केली. त्याला न्यायालयात हजार केले असता न्यायालयाने न्यायालयीन कोठडी सुनावली. पुढील तपास लोणीकंद पोलीस करीत आहेत.
