पिंपरी : पिंपरी-चिंचवडमधून एक धक्कादायक घटना समोर आली आहे. फोनवर बोलत असताना एका तरुणाने घरासमोरून गेलेली विजेची तार पकडल्याने त्याला विजेचा धक्का लागून तरुणाचा मृत्यू झाल्याची घटना घडली आहे. ही घटना रविवारी (दि. 11) सकाळच्या सुमारास मोशीतील जाधववाडी परिसरात घडली. रामब्रज हरिसिंग तेगोर (वय-22, पडवळनगर, थेरगाव) असे मृत्यूमुखी पडलेल्या तरुणाचे नाव आहे.
पोलसांनी दिलेल्या माहितीनुसार, रामब्रज हे फरशी बसविण्याचे काम करण्यासाठी जाधववाडी मोशी येथे आले होते. सकाळी अकरा वाजताच्या सुमारास रामब्रज यांना फोन आला. फोनवर बोलण्यासाठी ते गॅलरीमध्ये गेले होते. या घरासमोरून विज वाहक तार गेली होती. बोलताना अचानक रामब्रज यांनी विजेची तार हातात पकडली.
यामध्ये विजेचा जोरदार धक्का बसून ते खाली पडले. त्यांना तात्काळ रुग्णालयात उपचारासाठी दाखल करण्यात आले. मात्र, उपचारापूर्वीच त्यांचा मृत्यू झाल्याचे डॉक्टरांनी सांगितले. याबाबत अधिक तपास एमआयडीसी भोसरी पोलीस करीत आहेत
