लोणी काळभोर : पुणे सोलापूर राष्ट्रीय महामार्गावर अज्ञात वाहनाने पाठीमागून दिलेल्या धडकेत कदमवाकवस्ती (ता.हवेली) येथील महिला जागीच ठार झाली आहे. ही घटना मांजरी फार्म येथील कुदळे शोरूम च्या परिसरात आज (शनिवारी ता.18) सकाळी सात वाजण्याच्या सुमारास घडली आहे.
पुष्पा सुभांश अमराळे (वय- 58, रा- कवडी माळवाडी, कदमवाकवस्ती, ता- हवेली जि- पुणे) असे मृत्यू झालेल्या महिलेचे नाव आहे.
मिळालेल्या माहितीनुसार, पुष्पा अमराळे या पुणे सोलापूर महामार्गावरून मांजरी फार्मच्या दिशेने पायी चालल्या होत्या. कुदळे शोरूमच्या समोरून जात असताना त्यांना एका अज्ञात वाहनाने पाठीमागून जोरदार धडक दिली. या अपघातात अमराळे यांच्या डोक्याला व हातापायाला मार लागल्याने गंभीर जखमी होऊन रस्त्यावरच निचपीत पडल्या होत्या.
या घटनेची माहिती स्थानिक नागरिकांनी त्वरित पोलिसांना दिली. या घटनेची माहिती मिळताच, हडपसर पोलीस तात्काळ घटनास्थळी दाखल झाले. पोलिसांनी अपघातात जखमी झालेल्या पुष्पा अमराळे यांना उपचारासाठी तात्काळ ससून रुग्णालयात दाखल करण्यात आले. मात्र तेथील डॉक्टरांनी पुष्पा अमराळे यांचा उपचारापूर्वीच मृत्यू झाल्याचे घोषित केले.
