उरुळी कांचन, (पुणे) : उरुळी कांचन जवळील शिंदवणे घाटात अपघाताचे सत्र सुरुच आहे. मंगळवारी (ता. 28) दुपारी साडेबारा वाजण्याच्या सुमारास पेपरचे बंडल असलेला ट्रक पलटी झाल्याची घटना घडली आहे. या घटनेत कोणतीही जीवितहानी झाली नसली तरी ट्रकचे मोठे नुकसान झाले आहे. तसेच पेपरच्या रिंगा रस्त्याच्या बाजूला पडलेल्या अवस्थेत दिसून येत आहे.
मिळालेल्या माहितीनुसार, सदरचा ट्रक हा सासवडवरून उरुळीच्या बाजूने निघाला होता. यावेळी घाटातील दुसऱ्या वळणावर ट्रकचालकाचे गाडीवरील नियंत्रण सुटले व ट्रक पलटी झाल्याचे उपस्थित असलेल्या नागरिकांनी सांगितले. या घटनेत चालकाला कोणतीही इजा झाली नसली तरी गाडीचे मोठे नुकसान झाले आहे.
दरम्यान, सदर ठिकाणी उरुळी कांचनचे पोलीस घटनास्थळी दाखल झाले असून पुढील कार्यवाही सुरु आहे.
