लोणी काळभोर : दुचाकी चोरणाऱ्या एका चोरट्याला गुन्हे शाखा युनिट क्र. 6 च्या पथकाने कदमवाकवस्ती (ता. हवेली) ग्रामपंचायत हद्दीतील कवडीपाट टोलनाक्यावरून शनिवारी (ता.9) अटक केली आहे. आरोपीकडून सुमारे 30 हजार रुपये किंमतीची दुचाकी पोलिसांनी जप्त केली आहे.
सागर बाबुराव वाघमारे (वय 27, रा.मु.पो. तांदुळवाडी, ता. माळशिरस, जि. सोलापूर) असे अटक करण्यात आलेल्या दुचाकी चोरट्याचे नाव आहे.
गुन्हे शाखा युनिट क्र. 6 चे वरिष्ठ पोलीस निरीक्षक प्रताप पोमण यांनी दिलेल्या माहितीनुसार, गुन्हे शाखेचे पथक लोणी काळभोर पोलीस ठाण्याच्या हद्दीत गस्त घालत असताना, पथकातील पोलीस नाईक नितीन मुंढे यांना कवडीपाट टोलनाका येथे एक दुचाकी चोरटा उभा आहे, अशी माहिती एका खबऱ्यामार्फत मिळाली होती.
मिळालेल्या माहितीच्या अनुषंगाने पोलिसांनी सदर ठिकाणी सापळा रचून आरोपी सागर वाघमारे याला मोठ्या शिताफीने ताब्यात घेतले. आरोपीच्या ताब्यातील दुचाकीबाबत चौकशी केली असता, सदर दुचाकी हि चोरीची असून आरोपीने जेजुरी पोलीस ठाण्याच्या हद्दीतून चोरल्याची माहिती समोर आली. त्यानंतर पोलिसांनी आरोपीच्या ताब्यातील दुचाकी तपासासाठी जप्त केली आहे. तर आरोपीची वैद्यकीय तपासणी करुन पुढील तपासासाठी जेजुरी पोलिसांकडे स्वाधीन करण्यात आले आहे.
हि कामगिरी गुन्हे शाखा युनिट क्र. 6 चे वरिष्ठ पोलीस निरीक्षक प्रताप पोमण यांच्या मार्गदर्शनाखाली रमेश मेमाणे, कानिफनाथ कारखेले, नितीन मुंढे, समीर पिलाने, ऋषिकेश व्यवहारे, ऋषीकेश ताकवणे, सचिन पवार, शेखर काटे, नितीन धाडगे, बाळासाहेब तनपुरे, गणेश डोंगरे, किर्ती मांदळे, प्रतिक्षा पानसरे व सुहास तांबेकर यांच्या पथकाने केली आहे.
