सागर घरत
करमाळा : परांडा-करमाळा मार्गावर पांडेजवळ (करमाळा, जि. सोलापूर) येथे बुधवारी पहाटे साडेपाच वाजण्याच्या सुमारास भीषण अपघात झाला. कंटेनर व कारमध्ये झालेल्या धडकेत चौघे जागीच ठार झाले तर सहाजण जखमी झाल्याची माहिती मिळत आहे. हा अपघात एवढा भीषण होता की अपघातातील कार कंटेनरला धडकून रस्त्यापासून लांब अंतरावर जाऊन उलटली. या अपघातामध्ये गाडीचा चक्काचूर झाला आहे.
अपघाताची माहिती मिळताच करमाळा पोलीस घटनास्थळी दाखल झाले. जखमींना करमाळा उपजिल्हा रुग्णालयात दाखल करण्यात आले आहे. अपघातातील कार गुलबर्गा येथून पांडे मार्गे शिर्डीला देवदर्शनासाठी जात असल्याचे सांगितले जात आहे. पांडे येथे आल्यानंतर त्यांच्या कारचा अपघात झाला. यामध्ये नवविवाहित दांपत्य असल्याचेही सांगितले जात आहे. अपघाताचे नेमके कारण समजू शकले नाही. हा अपघात पांडे येथील फिसरेच्या बाजूला असलेल्या वळणावर झाला आहे.
दरम्यान, जखमींना उपजिल्हा रुग्णालयात दाखल करण्यात आले आहे. पांडे येथील नागरिकांनी अपघातग्रस्तांना मदत केली. श्रीशैल चांदेगा कुंभार (वय ५५), शशिकला श्रीशैल कुंभार (वय ५०), ज्येमी दीपक हुनशामठ (३८ रा. गुलबर्गा) व शारदा हिरेमठ (वय ६७, रा. हुबळी) अशी मृत्यू झालेल्या व्यक्तींची नावे आहेत. तर सौम्या श्रीधर कुंभार (वय २६), कावेरी विश्वनाथ कुंभार (वय २४), शशिकुमार त्रिशाला कुंभार (३६), श्रीदार श्रीशाल कुंभार (वय ३८), नक्षत्रा विश्वनाथ कुंभार (वय ८ महिने) व श्रीकांत रामकुमार चव्हाण (वय २६) अशी जखमीची नावे आहेत.
अपघातग्रस्तांवर डॉ. गजानन गुंजकर व डॉ. कोळेकर यांच्या मार्गदर्शनाखाली उपचार सुरु आहेत.
