पुणे : पुण्यात वाघोली परिसरात रायझिंग स्टार या स्कूलची बस झाडावर आदळून भीषण अपघात झाला आहे. अपघात झाला तेव्हा स्कूल बसमध्ये विद्यार्थी होते. या अपघातामध्ये अनेक विद्यार्थी जखमी झाले आहेत. स्थानिकांच्या मदतीने जखमी विद्यार्थ्यांना तातडीने खासगी रुग्णालयात दाखल करण्यात आले असून, त्यांच्यावर उपचार सुरू आहेत.
अपघाताचे नेमके कारण अद्याप स्पष्ट झालेले नाही. मात्र, चालकाचे बसवरील नियंत्रण सुटल्याने हा अपघात झाल्याचा व्हिडीओ समोर आला आहे. या व्हिडीओमध्ये ही भरधाव स्कूल बस रस्ता सोडून थेट बाजूच्या झाडावर आदळल्याचे स्पष्ट दिसत आहे. या घटनेत काही विद्यार्थी जखमी झाले आहेत. हा अपघात झाला त्यावेळी आजूबाजूच्या लोकांनी धाव घेतली आणि मुलांना जवळच्या रुग्णालयात दाखल केले.
दरम्यान, स्कूल बसचा अपघात झाल्यामुळे विद्यार्थ्यांच्या सुरक्षेचा प्रश्न पुन्हा एकदा चर्चेत आला आहे. स्कूल बसवर आरटीओचे नियंत्रण नसल्याचा आरोप पालक करत आहेत. सीसीटीव्ही फुटेजवरून या अपघातासाठी बसचा ड्रायव्हर जबाबदार असल्याचे स्पष्ट होत आहे. त्यामुळे आरटीओने या बस ड्रायव्हरवर कारवाई करण्याची मागणी केली जात आहे.
याप्रकरणी लोणीकंद पोलीस ठाण्यात बसच्या चालकावर गुन्हा दाखल करण्यात आला आहे. पुढील तपास लोणीकंद पोलीस करत आहेत.
