पुणे : येथील कल्याणीनगर भागात झालेल्या पोर्शे अपघात प्रकरणातील चर्चा सुरु असतानाच आता पुन्हा एकदा धानोरी परिसरात मध्यरात्री भीषण अपघात झाला आहे. या घडलेल्या अपघातात भरधाव वेगाने येणा-या चारचाकी गाडीने रस्त्याच्या कडेला थांबलेल्या रिक्षाला जोरदार धडक दिली आहे. या अपघातात रिक्षात थांबलेले चौघेजण जखमी झाल्याची माहिती समोर आली आहे.
सोमवारी (दि.17) मध्यरात्री साडेबारा वाजण्याच्या सुमारास धानोरी येथील पोरवाल रस्त्यावर हा भीषण अपघात घडला आहे. या घटनेतील आरोपी कार चालकाला विमानतळ पोलीसांनी ताब्यात घेतले आहे.
या घटनेसंदर्भात मिळालेल्या माहितीनुसार, सोमवारी (दि.17) मध्यरात्री साडेबारा वाजण्याच्या सुमारास आईस्क्रीम खाण्यासाठी रिक्षा चालक थांबला होता. यावेळी रिक्षामध्ये दोन महिला, एक लहान मुलगी आणि रिक्षा चालक असे चौघेजण होते. या दरम्यान पोरवाल रस्त्यावरुन भरधाव वेगाने जाणा-या कारने रिक्षाला जोरदार धडक दिली आहे. यामध्ये रिक्षातील तिघेजण किरकोळ जखमी झाले आहेत. तर रिक्षा चालक गंभीर जखमी झाला आहे. तातडीने त्यांना जवळच्या रुग्णालयात दाखल करण्यात आले आहे.
यावेळी अपघाताची माहिती मिळाल्यानंतर विमानतळ पोलीसांनी घटनास्थळी धाव घेतली आहे. कारचालकास ताब्यात घेण्यात आले. तसेच वैद्यकीय चाचणीसाठी त्याला रुग्णालयात नेण्यात आले आहे. याप्रकरणी रिक्षा चालक आणि त्याच्या कुटुंबीयांचा जबाब नोंदवण्यात आला आहे. तसेच या घटनेसंदरर्भात गुन्हा दाखल करण्याची प्रक्रिया सुरु आहे.
