लोणी काळभोर : पुणे सोलापूर राष्ट्रीय महामार्ग ओलांडताना एका ज्येष्ठ नागरिकाला अज्ञान वाहनाने धडक दिली आहे. या अपघातात गंभीर जखमी होऊन अनोळखी नागरिकाचा मृत्यू झाला आहे. ही घटना कदमवाकवस्ती (ता. हवेली) ग्रामपंचायत हद्दीतील प्राजक्ता हाडके पेट्रोल पंपासमोर सोमवारी (ता.26) रात्री पावणे बारा वाजण्याच्या सुमारास घडली आहे.
याप्रकारणी पोलीस अंमलदार प्रशांत प्रकाश सुतार यांनी सरकारच्या वतीने लोणी काळभोर पोलीस ठाण्यात फिर्याद दिली आहे. त्यानुसार अज्ञात चालकाच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, अंदाजे 65 वर्षाचा अनोळखी व्यक्ती हा पुणे सोलापूर महामार्ग ओलांडत होता. रस्ता ओलांडत असताना, एका अज्ञात वाहन चालकाने वाहतुकीच्या नियमांकडे दुर्लक्ष करून, हयगयीने, अविचाराने व भरधाव वेगात चालवुन अनोळखी इसमाला जोरदार धडक दिली.
दरम्यान, या अपघातात 65 वर्षीय अनोळखी व्यक्ती गंभीर जखमी झाले होते. तसेच त्यांच्या डोक्यातून मोठ्या प्रमाणात रक्तस्त्राव झाला. त्यांना पुण्यातील एका दवाखान्यात उपचारासाठी दाखल करण्यात आले. त्यांचा उपचारादरम्यान मृत्यू झाला.
याप्रकरणी लोणी काळभोर पोलीस ठाण्यात अज्ञात वाहनचालकाच्या विरोधात भारतीय न्याय संहिता कलम 281,125(ब), 106 (1) मोटार वाहन कायदा कलम 184, 134(1), 119/177 अन्वये गुन्हा दाखल करण्यात आला आहे. पुढील तपास सहाय्यक पोलीस निरीक्षक किशोर पवार करीत आहेत.
