लोणी काळभोर, ता.3: भांडण सुरू असताना, व्हिडिओ शूटिंग काढत असल्याच्या संशयावरून गर्भवती महिलेचा विनयभंग करून मारहाण तर तिची नातेवाईक असलेल्या आत्याला कपडे फाटेपर्यंत बेदम मारहाण केल्याची घटना घडली आहे. ही घटना कदमवाकवस्ती (ता.हवेली) ग्रामपंचायत हद्दीतील इराणी वस्ती येथे गुरुवारी (ता.1) सायंकाळी सात वाजण्याच्या सुमारास घडली आहे. याप्रकरणी लोणी काळभोर पोलीस ठाण्यात चार जणांविरोधात गुन्हा दाखल करण्यात आलेला आहे.
जफर इराणी, शाजमान हाजी इराणी, मजलुम हाजी इराणी व शब्बीर जावेद जाफरी (रा. सर्व इराणी वस्ती, पठारे वस्ती, लोणी काळभोर, ता. हवेली, जि. पुणे) अशी गुन्हा दाखल करण्यात आलेल्या आरोपींची नावे आहेत. याप्रकरणी एका 33 वर्षीय महिलेने लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी या गर्भवती असून त्या कदमवाकवस्ती येथील पठारे वस्ती परिसरात राहतात. फिर्यादी यांची आत्या व आरोपी यांचा पहिला वाद झाला होता. या जुन्या भांडणाचा राग मनात धरून त्यांच्यामध्ये पुन्हा भांडणे लागली होती. आरोपी हे शिवीगाळ करीत असताना, फिर्यादी या त्या भांडणाचे व्हिडिओ रेकॉर्डिंग करीत असल्याच्या संशयावरून, आरोपींनी हाताने मारहाण केली. यावेळी पीडिता म्हणाल्या पोटात बाळ आहे मारू नका.
तेव्हा आरोपींनी कोणताही विचार न करता पुन्हा मारहाण केली. तसेच त्यांना लगट करण्याचा प्रयत्न करून मनात लज्जा उत्पन्न होईल असे गैरवर्तन केले. या हाणामारीत फिर्यादी या जखमी झाल्या आहेत. फिर्यादी यांना आरोपी मारहाण करीत असल्याचे पाहून त्यांची आत्या मध्यस्ती करून भांडणे सोडविण्यासाठी गेल्या असता, आरोपींनी त्यांनाही कपडे फाटेपर्यंत मारहाण केली.
याप्रकरणी पीडितेने लोणी काळभोर पोलीस ठाण्यात फिर्याद दिली आहे. त्यानुसार चार आरोपींच्या विरोधात भारतीय न्याय संहिता सन 2023 चे कलम 74,352, 115(2), 351 (2), 3(5) प्रमाणे गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलिस उपनिरीक्षक दिगंबर सोनटक्के करीत आहेत.
