लोणी काळभोर : पुणे सोलापूर महामार्गावरुन रस्ता ओलांडताना अज्ञात वाहनाने धडक दिल्याची घटना घडली होती. हि घटना कदमवाकवस्ती (ता. हवेली) ग्रामपंचायत हद्दीतील कवडीपाट टोलनाका परिसरातील श्रीनाथ मोटर्सच्या जवळ मंगळवारी (ता.7 मार्च) रोजी अकरा वाजण्याच्या सुमारास घडली होती. या अपघातात उरुळी कांचन (ता. हवेली) येथील जखमी झालेल्या व्यक्तीचा उपचारादरम्यान मृत्यू झाला आहे.
बाबु मानुदास मोहिते (वय 60, रा. गोळेवस्ती, उरुळी कांचन, पुणे) असे मृत्यू झालेल्या व्यक्तीचे नाव आहे. याप्रकरणी प्रमोद मोहिते (वय-30 रा. गोळेवस्ती, उरुळी कांचन) यांनी लोणी काळभोर पोलीस ठाण्यात फिर्याद दिली आहे. त्यानुसार अज्ञात वाहनावरील अज्ञात चालकावर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी प्रमोद मोहिते यांचे वडील बाबु मोहिते हे कामानिमित्त कवडीपाट टोलनाक्यावर आले होते. तेव्हा पुणे सोलापूर महामार्ग ओलांडताना, पुण्याकडून सोलापूरच्या दिशेने चाललेल्या अज्ञात वाहनाने बाबु मोहिते यांना जोरदार धडक दिली. या अपघातात बाबु मोहिते गंभीर जखमी झाले होते. त्यांची प्रकृती गंभीर असल्याने त्यांना तातडीने ससून रुग्णालयात उपचारासाठी दाखल करण्यात आले होते. बाबु मोहिते यांची मृत्यूची सुरु असलेली झुंज अखेर दहा दिवसांनी संपली. आणि त्यांच्या उपचारादरम्यान मृत्यू झाल्याचे ससून मधील डॉक्टरांनी घोषित केले.
दरम्यान, अज्ञात इसमाने वाहतुकीचे नियमांकडे दुर्लक्ष करून, हयगयीने, अविचाराने व भरधाव वेगात त्याच्या ताब्यातील चालवून बाबु मोहिते यांना जोरदार ठोसर मारली. व कोणतीही मदत न करता घटना ठिकाणाहून पसार झाला. त्यामुळे अज्ञात चालक हा बाबु मोहिते यांच्या मृत्यूस कारणीभूत आहे. अशी फिर्याद प्रमोद मोहिते यांनी लोणी काळभोर पोलीस ठाण्यात दिली आहे. त्यानुसार अज्ञात वाहनचालकाच्या विरोधात गुन्हा दाखल करण्यात आला आहे. पुढील तपास पोलीस उपनिरीक्षक किरण धायगुडे करीत आहेत.
