लोणी काळभोर : पुणे-सोलापूर राष्ट्रीय महामार्गावरून भरधाव वेगाने चाललेल्या अज्ञात वाहनाने रस्ता ओलांडणाऱ्या पादचाऱ्याला जोरदार धडक दिली. या अपघातात पादचाऱ्याचा जागीच मृत्यू झाला. ही घटना कुंजीरवाडी (ता. हवेली) ग्रामपंचायत हद्दीतील नायगाव फाटा येथे रविवारी (ता. ७) रात्री साडेदहा वाजण्याच्या सुमारास घडली.
लखन बाळ गायकवाड (वय ३६, रा. कुंजीरवाडी, नायगाव फाटा, पुणे) असे मृत्यू झालेल्या व्यक्तीचे नाव आहे. या प्रकरणी लखनचा चुलत भाऊ सागर गायकवाड (वय ३५) याने लोणी काळभोर पोलीस ठाण्यात फिर्याद दिली आहे. त्यानुसार अज्ञात वाहनचालकाविरोधात गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, लखन गायकवाड हे रविवारी रात्री साडेदहा वाजण्याच्या सुमारास घरी चालले होते. पुणे-सोलापूर महामार्गावरून रस्ता ओलांडत असताना, त्यांना पुण्याकडून सोलापूरच्या दिशेने चाललेल्या भरधाव वाहनाने जोरदार धडक दिली. या अपघातात लखन गायकवाड हे गंभीर जखमी होऊन त्यांचा जागीच मृत्यू झाला. तर अज्ञात चालक हा गाडी घेऊन पसार झाला आहे.
या प्रकरणी सागर गायकवाड याने लोणी काळभोर पोलीस ठाण्यात फिर्याद दिली आहे. त्यानुसार अज्ञात वाहनचालकाविरोधात गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक शशिकांत चव्हाण यांच्या मार्गदर्शनाखाली पोलीस उपनिरीक्षक अमोल घोडके करीत आहेत.
