पुणे : हडपसर परिसरामध्ये दोन अल्पवयीन मुलीवर दोन वेगवेगळ्या बलात्काराच्या घटना घडल्या आहेत. पहिल्या घटनेत 42 वर्षीय आरोपीने 14 वर्षीय अल्पवयीन मुलीवर लैंगिक अत्याचार करत मारहाण केल्याची घटना घडली आहे. तर दुसऱ्या घटनेमध्ये एका 31 वर्षीय व्यक्तीने 16 वर्षीय मुलीला लोणी काळभोर येथील एका हॉटेलमध्ये घेऊन जात तिच्यावर अत्याचार केला आहे. या दोन्ही घटनांप्रकरणी हडपसर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, पहिल्या घटनेत 14 वर्षीय मुलगी आपल्या आई-वडिलांसह हडपसर परिसरातील एका पुनर्वसन केलेल्या शासकीय वसाहतीमध्ये राहण्यास आहे. 42 वर्षीय नराधम आरोपीने अल्पवयीन मुलीच्या घरात कोणी नसल्याचा फायदा घेत घरामध्ये घुसून मुलीवर बलात्कार केला. तसेच पीडित अल्पवयीन मुलीवर दोन वर्षांपूर्वी देखील लैंगिक अत्याचार केला होता. या घटनेतून पीडिता सावरत नाही तोपर्यंत पुन्हा तिच्यावर 42 वर्षीय नराधमाने लैंगिक अत्याचार केल्याचे फिर्यादीत म्हटलं आहे.
तर दुसऱ्या घटनेत, अल्पवयीन मुलीला लग्नाचं आमिष दाखवून जबरदस्तीने शारीरिक संबंध ठेवल्याचं समोर आलं आहे. आरोपीने धमकी आणि मारहाण केल्याचा आरोप देखील पीडितेने केला आहे. या प्रकरणी 31 वर्षीय आरोपी आणि त्याचा दुसरा नातेवाईक या दोघांवर गुन्हा दाखल करण्यात आला आहे. दोन्ही आरोपींनी सोळा वर्षीय अल्पवयीन मुलीला लोणी काळभोर येथील एका हॉटेल मध्ये घेऊन जात 31 वर्ष आरोपीने अल्पवयीन मुलीवर बलात्कार केला.
तर त्याचा दुसऱ्या नातेवाईकाने अल्पवयीन तरुणीला आरोपी सोबत लैंगिक संबंध ठेवण्यास भाग पाडले. तसेच वहिनी म्हणून तिचा विनयभंग केल्याचे फिर्यादीत म्हटले आहे . या दोन्ही घटना शहरातील हडपसर परिसरात घडल्या आहेत. या दोन्ही प्रकरणात हडपसर पोलीस ठाण्यात अॅट्रॉसिटी सह लैंगिक अत्याचार आणि इतर गंभीर कलमांतर्गत गुन्हा दाखल करण्यात आला आहे. या घटनेचा पुढील तपास हडपसर पोलीस करत आहेत.
