पुणे : लोणी काळभोर येथील एमआयटी महाविद्यालयात प्रवेश मिळवून देण्याच्या बहाण्याने एकाची तब्बल अडीच लाख रुपयांची फसवणूक झाल्याची घटना लष्कर परिसरातुन समोर आली आहे. याप्रकरणी लष्कर पोलीस ठाण्यात गुन्हा दाखल करण्यात आला आहे. यासीन इस्माईल शेख (वय 39, रा. रास्तापेठ) याच्याविरुद्ध गुन्हा दाखल करण्यात आला आहे. याबाबत इरफान सुभान शेख (वय 46, रा. कोंढवा, पुणे) यांनी लष्कर पोलीस ठाण्यात तक्रार दिली आहे.
पोलिसांनी दिलेल्या माहितीनुसार, हा प्रकार 8 ते 20 ऑगस्ट 2024 दरम्यान घडला. आरोपी यासीन शेख याने फिर्यादी इरफान यांचा विश्वास संपादन केला. फिर्यादी यांच्या मुलाला लोणी काळभोर येथील एमआयटी महाविद्यालयात एमबीएसाठी प्रवेश मिळवून देतो अशी बतावणी केली. प्रवेश मिळवून देण्यासाठी फिर्यादीकडून आरोपीने अडीच लाख रुपये घेतले. घेतलेली रक्कम महाविद्यालयात प्रवेशासाठी न भरता स्वत: वापरली.
दरम्यान आपली फसवणूक झाल्याचे लक्षात आल्यानंतर आता फिर्यादी इरफान यांनी लष्कर पोलीस ठाण्यात तक्रार दिली. अधिक तपास पोलीस उपनिरीक्षक राहुल घाडगे करीत आहेत.
