पुणे : पुण्यातील लोहगाव परिसरातून एक मोठी बातमी समोर आली आहे. महाविद्यालय परिसरात बिबट्याचा वावर असल्यामुळे कॉलेज बंद करण्याची वेळ आली आहे. ही घटना पुण्यातील लोहगाव-वडगाव शिंदे रस्त्यावरील आरआयटी कॉलेज येथे घडली आहे. आरआयटी कॉलेजच्या आवारात बिबट्या शिरला आहे, अशी माहिती समोर आली आहे. त्यामुळे कॉलेज बंद करण्याचा निर्णय कॉलेज प्रशासनाने घेतला आहे. कॉलेज आवारात बिबट्या आहे, असं समजल्यानंतर विद्यार्थ्यांमध्ये मोठी घबराट पसरली होती.
मिळालेल्या प्राथमिक माहितीनुसार, आरआयटी महाविद्यालयाच्या परिसरात दाट झाडी आहे. वडगाव शिंदे गावाजवळ इंद्रायणी नदी आहे. इंद्रायणी नदीपात्रातून बिबट्या महाविद्यालयाच्या परिसरात दोन बिबटे असल्याची शक्यता वर्तवली जात आहे. त्यामुळे कॉलेज पूर्णपणे बंद करण्यात आलेलं आहे. कॉलेजमधील एका कॅन्टीनमध्ये काम करत असलेल्या कर्मचाऱ्याने बिबट्याला पाहिलं आहे, अशी माहिती मिळतेय. या घटनेनंतर कॉलेजमध्ये आता अग्निशमन दल आणि वनविभाग दाखल झाले असून बिबट्याचा शोध घेण्याचं काम सुरू आहे.
आरआयटी कॉलेज बंद
विद्यार्थ्यांच्या सुरक्षेच्या पार्श्वभूमीवर महाविद्यालय प्रशासनाने कॉलेज बंद करण्याचा निर्णय घेतला आहे. कॉलेजमध्ये बिबट्या घुसल्याची माहिती मिळताच विद्यार्थ्यांमध्ये मोठी खळबळ उडाली आहे. आता घटनास्थळी अग्निशमन दल आणि वनविभागाच्या कर्मचाऱ्यांकडून बिबट्याचा शोध घेतला जात असून अद्याप शोध लागलेला नाही, अशी माहिती अग्निशमन दलाचे केंद्रप्रमुख सुभाष जाधव यांनी दिली आहे.
