पिंपरी : चाकण-शिक्रापूर मार्गावर १६ जानेवारी रोजी भरधाव कंटेनरने एका मुलीला धडक दिली होती. या धडकेत जखमी झालेल्या मुलीचा गुरुवारी पिंपरीत उपचारादरम्यान मृत्यू झाला आहे. धनश्री अंबादास गाढवे ( वय ७, रासे, खेड) असे मृत्यू झालेल्या मुलीचे नाव आहे.

चाकण पोलिसांनी दिलेल्या माहितीनुसार, धनश्री आईबरोबर १६ जानेवारी रोजी दुचाकीवरून जात होती. त्या वेळी भरधाव वेगात आलेल्या कंटेनरने दुचाकीला धडक दिली. या त्या धडकेत तिघीही जखमी झाल्या होत्या. धनश्री हिच्यावर पिंपरीतील डॉ. डी. वाय. पाटील रुग्णालयात उपचार सुरू होते. गुरुवारी उपचारादरम्यान धनश्री हिचा मृत्यू झाला.
पोलिसांच्या मोटारीसह दहा वाहनांना धडक देणारा कंटेनर चालक अकिब अब्दुल रज्जाक खान (वय २५, रा. पलवल, हरियाणा) याच्यावर सरकारी कामात अडथळा आणणे आणि अपघात करणे असे दोन गुन्हे चाकण पोलीस ठाण्यात दाखल आहेत. शिक्रापूर पोलीस ठाण्यातही अपघाताचा गुन्हा दाखल आहे. एका डंपरला धडक दिल्यानंतर कंटेनर बंद पडला. नागरिकांकडून अकिबला बेदम मारहाण करण्यात आली. यामध्ये गंभीर जखमी झालेल्या अकिबवर पुण्यातील ससून रुग्णालयात उपचार सुरू होते. रुग्णालयातून सोडल्यानंतर चाकण पोलिसांनी त्याला अटक केली.

जखमी झालेल्या मुलीचा मृत्यू झाल्याने अपघाताच्या गुन्ह्यात सदोष मनुष्यवधाच्या गुन्ह्याची कलमवाढ केली जाणार आहे. अशी माहिती वरिष्ठ पोलीस निरीक्षक प्रमोद वाघ यांनी दिली. दरम्यान, चालक अकिबने मद्यप्राशन केले नसल्याचे वैद्यकीय चाचणीतून निष्पन्न झाले आहे. मारहाण झाल्याने घाबरून त्याने कंटेनर बेफामपणे चालविल्याची माहिती पोलिसांकडून देण्यात आली आहे.







