पुणे : राज्यात हिट अँड रन काही थांबेना.. पुण्यातील कल्याणीनगरमधील हिट अँड रन प्रकरणानंतर एका मागून एक अपघाताच्या घटना समोर येत आहे. मुजोर चालकांच्या वेगाला सामान्य नागरिक बळी पडत आहेत. अशातच काल नगर-कल्याण महामार्गावर असाच एक अपघात घडला आहे. या अपघाताचा व्हिडिओ आता समोर आला आहे.
कमी वर्दळीच्या रस्त्यावरून एक बाईकवर जोडपं बसून जात असताना तेवढ्यात भरधाव वेगाने मागून आलेल्या कारने बाईकला थेट धडक दिली. समोर ती धडक एवढी जोरदार होती की, बाईकवरील दोघेही एखाद्या चेंडू प्रमाणे वर उडाले आणि गाडीच्या टपावर आपटून रस्त्यावर आदळले. या भीषण अपघातात सुदैवाने जोडपं बचावलं असले तरी त्यांना बरीच दुखापत झाली आहे. काळजाचा थरकाप उडवणाऱ्या या अपघाताचा व्हिडीओ आता समोर आला आहे.
नगर कल्याण महामार्गावरील पिंपरी पेंढार येथे दुपारच्या सुमारास हा अपघात झाला. त्याच परिसरातील एका सीसीटीव्हीमध्ये ही संपूर्ण घटना कैद झाली. एवढा मोठा अपघात होऊनही बाईकवरू उ़डून खाली आदळलेलं ते जोडपं बचावलं आहे. त्यांना आळेफाटा येथील खाजगी दवाखान्यात उपचारार्थ दाखल केले आहे. या अपघाताप्रकरणी पोलिसांनी गुन्हा दाखल केला असून धडक देणारी ती कार कोणाची होती, त्याचा मालक कोण याचा पोलिस शोध घेत आहेत.
