पुणे : पुण्यातून एक संतापजनक घटना समोर आली आहे. कॉम्प्युटर क्लास चालू असताना शर्ट इन का केला नाही, यावरून एका शिक्षकाने ११ वर्षाच्या मुलाला बेदम मारहाण केली आहे. त्याच्या नाकातून व कानातून रक्तस्त्राव झाला आहे.
स्वारगेट पोलिस ठाण्यात या शिक्षकावर गुन्हा दाखल करण्यात आला आहे. संदेश भोसले (वय-२६) असे या शिक्षकाचे नाव आहे. याबाबत मुलाच्या वडिलांनी (वय-४४) स्वारगेट पोलिस ठाण्यात फिर्याद दिली आहे. हा प्रकार एका शाळेतील ६ वीच्या क्लासरुममध्ये २७ सप्टेंबर रोजी घडला आहे
पोलिसांनी दिलेल्या माहितीनुसार, फिर्यादीचा ११ वर्षांचा मुलगा ६ वीमध्ये शिक्षण घेत आहे. क्लास रुममध्ये कॉम्प्युटरचा क्लास सुरु असताना कॉम्प्युटरचे शिक्षक संदेश भोसले यांनी इनशर्ट का केले नाही, या कारणावरुन फिर्यादीच्या मुलाला हाताने बेदम तसेच अमानुष मारहाण केली.
त्यामुळे मुलाच्या नाकातून व कानातून रक्तस्त्राव झाला. शाळेतून घरी आल्यानंतर मुलाने त्याच्या आईला घडलेल्या प्रकार सांगितला. त्यानंतर त्यांनी स्वारगेट पोलीस ठाण्यात धाव घेत तक्रार दाखल केली. त्यावरून पोलिसांनी गुन्हा दाखल केला असून पुढील तपास पोलीस उपनिरीक्षक तानावडे करीत आहे.
