पुणे : पुणे शहरात गुन्हेगारीच्या घटनांमध्ये वाध होताना दिसत आहे. अशातच आता खुनशीने का बघतोय, असं म्हणत एका टोळक्याने हडपसर परिसरातील काळेपडळ येथे पार्क केलेल्या रिक्षा, कार, टेम्पो अशा ९ वाहनांवर दगडफेक करुन दहशत माजविली. हा प्रकार काळेपडळ येथील म्हसोबा मंदिराजवळील स्वराज पार्क येथे सोमवारी (दि. ३०) पहाटे पावणे दोन वाजण्याच्या सुमारास घडला आहे.
याबाबत अभिषेक उद्धव झगडे (वय २४, रा. स्वराज पार्क, काळेपडळ) यांनी वानवडी पोलीस ठाण्यात फिर्याद दिली आहे. त्यावरून साहील कांबळे व त्याच्या चार साथीदारांवर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी हे पहाटे आपल्या सोसायटीत उभे होते. त्यावेळी आरोपी साहिल कांबळे हा त्यांच्याकडे खुनशीने बघत होता. त्याचा राग मनात धरुन कांबळे व त्याच्या चार साथीदारांनी ५ रिक्षा, २ कार व २ टेम्पो अशा ९ वाहनांवर दगडफेक करुन त्यांच्या काचा फोडून नुकसान केल्याचे फिर्यादीत म्हटले आहे.
या घटनेचा पुढील तपास सहायक फौजदार साबळे करीत आहेत. दरम्यान, या गुन्ह्यातील फरार आरोपी अक्षय संतोष राख (वय १९, रा. संकेत विहार, काळेपडळ) याला गुन्हे शाखेच्या युनिट ५ च्या पथकाने पकडले आहे. पुढील कारवाईसाठी वानवडी पोलिसांच्या ताब्यात दिले आहे.
