पुणे : विधानसभा सार्वत्रिक निवडणुकीच्या पार्श्वभूमीवर पुणे जिल्ह्यात राज्य उत्पादन शुल्क विभागाच्या वतीने १ ऑक्टोबर २०२४ पासून ९२३ गुन्हे दाखल केले असून, ८४३ जणांना अटक करण्यात आली आहे. या कारवाईत ९६ वाहनांसह ३ कोटी ५१ हजार रुपये किमतीचा मुद्देमाल जप्त केल्याची माहिती राज्य उत्पादन शुल्क पुणे विभागाचे अधीक्षक चरणसिंह बी. राजपूत यांनी दिली.
विधानसभा निवडणुकीच्या पार्श्वभूमीवर राज्य उत्पादन शुल्क आयुक्त डॉ. विजय सूर्यवंशी, पुणे जिल्ह्याचे जिल्हाधिकारी तथा जिल्हा निवडणूक अधिकारी डॉ. सुहास दिवसे, राज्य उत्पादन शुल्कचे अंमलबजावणी व दक्षता सह आयुक्त प्रसाद सुर्वे यांच्या मार्गदर्शन व सूचनेनुसार १ ऑक्टोबरपासून विधानसभा निवडणुकीच्या पार्श्वभूमीवर विविध पथके तयार करण्यात आली आहेत. या पथकांकडून जिल्ह्यातील सर्व हातभट्टी निर्मिती, वाहतूक, विक्री, तसेच ढाबे, अवैध ताडी धंदे यांच्यावर कारवाई करण्यात येत आहे.
जिल्ह्यात अवैध मद्य वाहतुकीस आळा घालण्याच्या दृष्टीने एकूण १८ तात्पुरते चेकनाके उभारून संशयित वाहनांची तपासणी करण्यात येत आहे. जिल्ह्यात सराईत गुन्हेगारांविरुद्ध महाराष्ट्र दारूबंदी कायदा १९४९ चे कलम ९३ अन्वये ५० प्रस्ताव संबंधित दंडाधिकाऱ्यांकडे दाखल केले आहेत.
जिल्ह्यात तीन दिवस ड्राय डे
जिल्ह्यात १८ नोव्हेंबर रोजी सायंकाळी ६ वाजल्यापसून ते २० नोव्हेंबर २०२४ मतदानप्रक्रिया पार पडेपर्यंत आणि २३ नोव्हेंबर २०२४ मतमोजणीच्या दिवशी सर्व विधानसभा मतदारसंघाचे अधिकृत निकाल घोषित होईपर्यंत कोरडा दिवस (ड्रायडे) घोषित करण्यात आलेला आहे. या काळात जिल्ह्यातील मद्य विक्री बंद राहील. अवैध मद्य निर्मिती, विक्री, वाहतूक किंवा मद्य वाटप आदी संबंधी माहिती, तक्रार द्यावयाची असल्यास टोल फ्री क्रमांक व राज्य उत्पादन शुल्क, पुणे विभाग अधीक्षक कार्यालयाच्या क्रमांकावर संपर्क साधावा, असे आवाहन राजपूत यांनी केले आहे.
