पुणे : पुणे आणि पिंपरी-चिंचवड शहरातील किमान १० लाख प्रवाशांची पीएमपी ही प्रमुख सार्वजनिक सेवा आहे. ताफ्यातील गाड्यांची संख्या वाढविण्याची मागणी सातत्याने स्वयंसेवी संस्था, प्रवासी संस्थांकडून होत होती. ही बाब लक्षात घेऊन पुढील वर्षभरात नव्याने विजेवर धावणाऱ्या ५०० गाड्या खरेदी करण्याचे नियोजन महापालिकेने केले आहे.
पीएमपी प्रशासनाने येत्या काही दिवसांत त्या संदर्भातील निविदा प्रक्रिया प्रसिद्ध होणार असून, १७७ गाड्यांची खरेदी पहिल्या टप्प्यात करण्यात येणार आहे. त्यामुळे पीएमपीच्या ताफ्यातील गाड्यांची संख्या वाढणार असून, प्रवाशांना जलद सेवा मिळण्यास मदत होणार आहे.
पीएमपीच्या सुतारवाडी आणि निगडी या आगारांमध्ये ‘बांधा-वापरा आणि हस्तांतरीत करा’ या तत्त्वावर आगारांचे व्यापारी विकसन करण्यात येणार आहे. त्यातून पीएमपीला उत्पन्न मिळण्यास मदत होणार आहे. पीएमपीसाठी महापालिकेकडून एकूण ४८२ कोटी रुपये मंजूर करण्यात आले आहेत.
४०० गाड्या सीएनजीवर असणार
पीएमपीच्या ताफ्यात सध्या विजेवर धावणाऱ्या ४७३ गाड्या आहेत. येत्या काही दिवसांत १७७ गाड्या दाखल होणार असून, त्यामुळे ही संख्या ६५० एवढी होणार आहे. त्यामध्ये नव्याने घोषणा केल्याप्रमाणे ५०० गाड्यांची भर पडणार आहे. प्रस्तावित ५०० गाड्यांमध्ये १०० गाड्या विजेवर धावणाऱ्या, तर ४०० गाड्या सीएनजीवरील असणार आहेत.
– विक्रम कुमार, प्रशासक तथा महापालिका आयुक्त.
