दौंड, (पुणे) : घराकडे पायी निघालेल्या एका ३२ वर्षीय तरुणाला अज्ञात वाहनाने दिलेल्या धडकेत त्याचा जागीच मृत्यू झाल्याची घटना घडली आहे. बेटवाडी (ता. दौंड) ग्रामपंचायत हद्दीतील येडेवस्तीजवळ मंगळवारी (ता. २६) मध्यरात्री साडेबारा वाजण्याच्या सुमारास घडली आहे.
संपत बाळासाहेब पायगुडे (वय – ३२, रा. येडेवस्ती, दौंड ता. दौंड) असे अपघातात मृत्यू झालेल्या तरुणाचे नाव आहे. याप्रकरणी त्याचे वडील बाळासाहेब नारायण पायगुडे यांनी दौंड पोलीस ठाण्यात अज्ञात व्यक्तीच्या विरोधात तक्रार दिली आहे.
पोलिसांनी दिलेल्या माहितीनुसार, मंगळवारी रात्री साडेबारा वाजण्याच्या सुमारास बेटवाडी गावचे हद्दीत बेटवाडी ते गार, येडेवस्तीकडे येणाऱ्या डांबरी रस्त्याने संपत पायगुडे आणि बजरंग पासलकर हे दोघे पायी चालत घरी निघाले होते. यावेळी येडेवस्ती येथे आले असता अज्ञात वाहनाने पाठीमागून ठोस दिली. या अपघातात पायगुडे यांच्या डोक्याला गंभीर दुखापत होऊन त्याचा मृत्यु झाला.
दरम्यान, अपघाताची खबर न देता व औषधोपचाराची कुठलीही मदत न करता तेथून निघून गेला आहे म्हणून अज्ञात वाहनावरिल अज्ञात चालकाविरूध्द दौंड पोलीस ठाण्यात दिलेल्या फिर्यादीवरून गुन्हा दाखल करण्यात आला आहे.
