पुणे : राज्य सरकारने राजापूर येथील पत्रकार शशिकांत वारीशे यांच्या कुटुंबाला २५ लाख रुपयांची मदत जाहीर केली आहे. तर शिक्षण घेत असलेल्या वारीशे यांचा मुलगा यश यालाही कायमस्वरूपी नोकरी घेण्यात येईल, अशी ग्वाही पालकमंत्री तथा उद्योगमंत्री उदय सामंत यांनी रत्नागिरीत पत्रकारांशी संवाद साधताना दिली.
राजापूर येथील पत्रकार शशिकांत वारीशे यांचा संशयास्पद मृत्यू झाला आहे. त्यांची हत्या करण्यात आल्याचा आरोप होत आहे. विरोधी पक्षांनी ठाकरे गटाची शिवसेना आणि राष्ट्रवादी काँग्रेससह विरोधी पक्षांनी हे प्रकरण उचलून धरले आहे. या प्रकरणी उपमुख्यमंत्री देवेंद्र फडणवीस यांनी शनिवारी एसआयटी चौकशीची घोषणा केली. आता वारीशे यांच्या कुटुंबाला सरकारने आज मदतीची मोठी घोषण केली आहे.
शशिकांत वारीशे यांच्या मृत्यू प्रकरणी संशयित आरोपी पंढरीनाथ आंबेरकर हा पोलीस कोठडीत आहे. या सगळ्या धक्कादायक जीवघेण्या प्रकरणात वारीशे यांचे कुटुंब कोलमडून पडले आहे. त्यांच्या कुटुंबाची व्यथा माध्यमांनी लावून धरत वास्तव जगासमोर आणले. आणि कुटुंबाला मदत करण्याच्या मागणीने जोर धरला. अखेर आज या मागणीला यश आले आहे.
राजापूरमधील कशेळी येथील पत्रकार शशिकांत वारीशे यांच्या मृत्यू नंतर त्यांचे कुटुंब उघड्यावर आले आहे. एक मुलगा आणि त्याची आजी यांच्यावर दुःखाचा डोंगर कोसळला आहे. या कुटुंबीयांना शासनाकडून मदत मिळावी, अशी मागणी पत्रकार संघटनांनी केली होती. रत्नागिरीतील पत्रकारांनी एकत्र येत ही मागणी उद्योगमंत्री उदय सामंत यांच्याकडे लावून धरली.
दरम्यान, पत्रकारांच्या या मागणीची दखल घेत मंत्री उदय सामंत यांनी तात्काळ मुख्यमंत्री एकनाथ शिंदे यांना फोनवरून चर्चा केली. या चर्चेत मुख्यमंत्री सहाय्यता निधीतून १० लाख व इतर माध्यमातून १५ लाख, अशी एकूण २५ लाखाची मदत वारीशे यांच्या कुटुंबीयांना देण्याचा निर्णय घेण्यात आला आहे, अशी घोषणा उद्योगमंत्री उदय सामंत यांनी केली आहे. तसेच वारीशे यांच्या मुलाला कायमची नोकरी देण्याचे आश्वासनही यावेळी उद्योगमंत्री उदय सामंत यांनी दिले.
