पुणे : पुण्यात कात्रज बायपास रस्त्यावर नवले पुलाखाली २ ट्रक एकमेकांवर धडकून मोठा अपघात झाला आहे. भरधाव ट्रक समोरील ट्रकवर पाठीमागून जोरदार आदळला. या अपघातात ट्रकचालकासह दोघेजण गंभीर जखमी झाले आहेत. ही घटना नवले पुलाखाली मंगळवारी पहाटे साडेचार वाजण्याच्या सुमारास घडली.
मिळालेल्या अधिक माहितीनुसार, कात्रज बायपास रस्त्यावर नवले पुलाखाली हा अपघात झाला आहे. आज पहाटे कात्रजहून वारजेच्या दिशेने दोन मालवाहू ट्रक निघाले होते. नवले पुलाखाली आल्यानंतर समोरील ट्रकचालकाने अचानक ब्रेक दाबला. त्यामुळे पाठीमागून येणारा भरधाव ट्रक समोरच्या ट्रकवर जोरात आदळला. या अपघातात मागच्या ट्रकमधील चालक आणि क्लीनर दोघे जखमी झाले आहेत. ट्रकची पुढील बाजू चेपल्याने ट्रकचालक स्टेअरिंग आणि सीटच्यामध्ये अडकून पडला होता. केबिनचा दरवाजा उघडत नसल्यामुळे दोघांनाही बाहेर पडता येत नव्हते.
याबाबत अग्निशामक दलाला माहिती मिळताच सिंहगड रस्ता, नवले पूल अग्निशामक केंद्राचे जवान दोन बंब आणि पीएमआरडीएच्या रेस्क्यू व्हॅनसह घटनास्थळी दाखल झाले. त्यानंतर ट्रकमध्ये अडकलेल्या चालक आणि क्लीनरची अग्निशामक दलाच्या जवानांनी सुखरूप सुटका केली असून त्यांना जवळच्या हॉस्पिटलमध्ये उपचारासाठी दाखल करण्यात आलं आहे.
