बारामती : बारामती तालुक्यातून एक भयानक घटना समोर आली आहे. भरधाव आयशर टेम्पोने 16 वर्षीय मुलाला चिरडल्याची घटना घडली आहे. ही घटना निरा-मोरगाव रस्त्यावर जगतापवस्ती येथे निरा डाव्या कालव्याच्या वळणावर घडली आहे. या अपघातात मुलाचा जागीच मृत्यू झाला आहे. इजाज खुर्शीद सय्यद (रा. पोकळे वस्ती, नीरा, ता. पुरंदर, जि. पुणे) असं अपघातात मृत्यू झालेल्या मुलाचे नाव आहे.
संतप्त जमावाने टेम्पो पेटवला
या अपघातात मुलाचा मृत्यू झाल्याने संतप्त जमावाने टेम्पो पेटवून दिला आहे. त्यामुळे काही काळासाठी या भागातील वातावरण तणावपूर्ण झाले होते. दरम्यान, वडगाव पोलिसांनी अपघातस्थळी धाव घेत संतप्त जमाव शांत केला. संतप्त जमावाने टेम्पो पेटवून दिल्याने टेम्पो जवळपास जळून खाक झाला आहे. अग्निशामक दलाकडून टेम्पोला लागलेली आग विझवण्याचे प्रयत्न सुरु आहे. घटनास्थळी अग्निशामक दल दाखल झाले असून टेम्पो पेटवून दिल्यानंतर काही काळ या भागात तणाव निर्माण झाला होता.
