पुणे : पुण्यात लोकसभा निवडणुकीत तिहेरी लढत होणार असून महायुतीकडून मुरलीधर मोहोळ, ‘मविआ’कडून काँग्रेसचे रविंद्र धंगेकर आणि ‘वंचित’कडून वसंत मोरे मैदानात उतरले आहेत. मात्र, महाराष्ट्र नवनिर्माण सेनेला जय महाराष्ट्र करून आलेले गेल्या काही दिवसांपासून चर्चित असलेले वंचित आघाडीचे उमेदवार वसंत मोरे यांनी काल शुक्रवारी उमेदवारी अर्ज दाखल केला.
यावेळी त्यांनी आपल्या संपत्तीचा उल्लेख केला आहे. ज्यामधून त्यांच्याकडे अनेक गाड्या, सोने आणि चांदी अशी मालमत्ता असल्याचे त्यांनी दाखल केलेल्या प्रतिज्ञापत्रातून समोर आले आहे.
वसंत मोरेंची संपत्ती किती?
वसंत मोरे आणि त्यांच्या कुटुंबीयांकडे ४ कोटी १६ लाख ६७ हजार ३६४ कोटी रुपयांची मालमत्ता आहे. मोरे यांच्यावर ३ कोटी ४९ लाख २३ हजार ४३९, पत्नीवर १८ लाख ८९ हजार, तर मुलावर ४७ हजार १४७ रुपयांचे कर्ज आहे. वसंत मोरे यांचे शिक्षण बारावीपर्यंत झाले आहे. मोरे यांच्यावर ७ गुन्हे दाखल आहेत.
तसेच वसंत मोरे यांच्याकडे इनोव्हा, ऑडी आणि ॲम्बेसिडर या चारचाकी, तर बुलेटसह ६ दुचाकी आणि एक ट्रक आहे. मोरे यांच्याकडे ७० ग्रॅम, पत्नीकडे २७० ग्रॅम सोने, तसेच पुणे जिल्ह्यातील आंबवणे, चिंचळे, बोपगांव, हिरपोडी, शिंदवणे, वेळू, कासुर्डी येथे शेतजमीन आहे. कात्रज येथे वाणिज्यिक गाळा आणि कात्रजमध्येच सदनिका अशी मालमत्ता असल्याचे वसंत मोरे यांनी दाखल केलेल्या प्रतिज्ञापत्रात नमूद केले आहे.
