पुणे : राष्ट्रवादी काँग्रेसमध्ये आपण नाराज असण्याचे काहीच कारण नाही. त्यामुळे मी कोणत्याही कारणास्तव नाराज नाही. मी नाराज असेल तर थेट शरद पवार, अजित पवार, सुप्रिया सुळे यांच्याशी बोलू शकतो.
त्यामुळे नाराज नाही, याचा पुनरुच्चार करीत आपण राष्ट्रवादी काँग्रेसमध्येच आहोत, असे शिरुर लोकसभा मतदारसंघाचे खासदार आणि अभिनेते डॉ. अमोल कोल्हे यांनी स्पष्ट केले.
गुजरात विधानसभा निवडणुकीच्या पार्श्वभूमीवर राष्ट्रवादी काँग्रेसने स्टार प्रचारकांची यादी जाहीर केली होती. त्यात शरद पवार, अजित पवार, जयंत पाटील, सुप्रिया सुळे आदी नेत्यांचा उल्लेख आहे.
त्या यादीत कोल्हे यांचे नाव नसल्याने आणि त्यांच्या नाराजीबाबत उलटसुलट चर्चा राजकीय वर्तुळात सुरु झाल्या होत्या. ‘राष्ट्रवादी काँग्रेसच्या शिर्डीतील शिबिरामध्ये आपल्या दातांच्या समस्येमुळे गैरहजर होतो.
त्याशिवाय गुजरातच्या स्टार प्रचारकांच्या यादीत आपण नाही. ती यादी तयार करणे माझ्या हातात कुठे? दिल्ली ऑफिसमधून ही यादी तयार झाली. तो त्यांचा निर्णय आहे, असे खासदार डॉ. अमोल कोल्हे यांनी स्पष्ट केले.
केंद्रीय सहकार मंत्री अमित शहा यांना भेटल्यानंतर भाजपमध्ये जाण्याच्या चर्चा सुरु झाल्या, असे विचारता, ‘आपण राष्ट्रवादी काँग्रेसमध्येच आहोत. आपली कोणतीही नाराजी नाही. नाराजी असण्याचे कारण नाही.
शिवनेरीवर भगवा ध्वज लावावा. तो आतापर्यंत लावण्यात आला नाही. शिवनेरीवर रोप वे करण्यात यावे अशी मागणी शहा यांच्याकडे भेटी दरम्यान केली.’ असे कोल्हेंनी सांगितले.
दरम्यान, ‘शिवप्रताप गरुडझेप’ या चित्रपटाचे स्क्रिनिंग हे दिल्लीतील मान्यवर नेत्यांच्या उपस्थित व्हावे अशी आपली इच्छा होती. त्यासाठी यासाठी केंद्रीय सहकारमंत्री अमित शहा यांची वेळ मागितली होती.
दिल्लीतील राज्यकर्त्यांना शिवाजी महाराजांबद्दल माहिती व्हावी हा स्वच्छ हेतू होता. त्या भेटीची शरद पवार, अजित पवार यांना माहिती दिली,’ याकडे डॉ. कोल्हे यांनी लक्ष वेधले.
